Lubhalwe nguCelani Sikhakhane
Ulandwe esesempeshenini obenguNgqongqoshe wezeziMali KwaZulu-Natal uNkk Peggy Nkonyeni ukuba ayobhekana necala lama-Amigos le nkohlakalo elenzeka esaphethe ezeMpilo ngo-2006.
UNkk Nkonyeni (64) ,uvele eNkantolo eNkulu eMgungundlovu , ebhekene necala lokukhwabanisa nenkohlakalo. Ukuvela kwakhe kuhambisana neqhaza okusolwa ukuthi walibamba ekuthengweni kwemishini yokuhlanza amanzi (Watakas) nemishini yomoya ezibhedlela (Oxyntakas) KwaZulu-Natal.
Leli cala libuya ngemumva kokuba lahoxiswa ngoMfumfu wangonyaka ka-2015 nokwasusa umsindo omkhulu kwaze kwagudluzwa umshushisi omkhulu okwakunguMnuz Mnuz Ncedile Dunywa.
Ngesikhathi kwenzeka le nkohlakalo uNkk Nkonyeni owayenguNgqongqoshe wezeMpilo e-KZN. Le mpahla yathengwa enkampanini Intaka Holdings, ephethwe wusomabhizinisi wase-Uruguay uDkt Gaston Savoi.
Izolo uNkk Nkonyeni uvele ehambisana noDkt Busisiwe Nyembezi , uVictor Ntshangase , u-Alson Sipho Buthelezi , uSandile Kuboni , uKuboni Shezi Incoporated , uLindelihle Mkhwanazi no-Rowmoor Investements 783 (Pty) Ltd.
Ngaphezu kwamacala , umbuso uthi phakathi kukaNcwaba ka-2006 noLwezi ka-2007 uNkk Nkonyeni nabanye ababili ( uMkhwanazi ne-Rowmoor Investments) babesebenzisana ukuze bemukele umhlomulo kaR500 000 enkampanini Intaka Holdings ukuze bayilekelele ithole umsebenzi ezibhedlela ezimbili.
Udaba luhlehlele u-11 kuNhlangulana ka-2026 , eNkantolo eNkulu eThekwini ukuze uMkhwanazi athole ummeli bese yena noNkk Nkonyeni bahlinzekwe ngezitatimende. Abanye abamangalelwa okukhona kubo uNkk Nkonyeni noMkhwanazi , bazobuyela enkantolo ngoNtulika wamhlaka-23 ukuze kulungiswe izendlela zokuqulwa kwecala.
NgoMandulo ka-2024, uSavoi wahlambuluka wavuma amacala eNkantolo eNkulu eMgungundlovu ,okubalwa kuwona amane okukhwabanisa , nayisithupha enkohlakalo enzeka eNorthern Cape naKwaZulu-Natal phakathi kuka 2004 no-2007. Udaba lwaphothulwa ngokuthi kube nesivumelwano sokuhlambuluka ngaphansi kuka-Section 105A of the Criminal Procedure Act.
Wagwetshwa ukuthi akhokhe inhlawulo ka-R 5 million , noma iminanyaka eyishumi ejele , wagwetshwa neminyaka eyishumi ejele yalengiswa iminyaka emihlanu. Inkantolo yakhipha umyalelo wokuthi kudliwe impahla kaR60 million. Wayalelwa nokuthi akhokhe uR15 million wezindleko zokudliwa kwempahla.