UCelani Sikhakhane ukulethela izindaba zakamuva ezenzeka KwaZulu-Natal.
EMpangeni: Kuhlonishwe uNdunankulu weSilo uMisuzulu kaZwelithini ngenxanxathela yezitolo okulindeleke ukuthi idale amakhulu emisebenzi entsheni yezifunda ezisenyakatho neKZN. Le nxanxathela yezitolo iqanjwe ngoMntwana uMangosuthu Buthelezi, owayenguNdunankulu isikhathi eside ngaphansi kwamakhosi amathathu amaZulu. Umbono wokuqamba leli gama ngoButhelezi uqhamuke ngemuva kokuthi abathuthukisi becele iNdlunkulu kaZulu ukuthi ibanike igama lanoma yisiphi isikhulu esiphezulu ukuze siqambe inxanxathela yezitolo. Kulapho-ke kwaphakanyiswa khona igama likaButhelezi base bemukelwa ngabathuthukisi.
Ezakheni: INational Prosecuting Authority iyasamukela isigwebo sodilikajele ababili kanye neminye iminyaka engu-35 ejele kuSphamandla Lucky Ndimande (28) esikhishwe yiNkantolo yesiFunda yaseZakheni. Lokhu kulandela ukugwetshwa kwakhe ngamacala amabili okudlwengula, amabili okuthumba, ukuzama ukubulala nelokugebenga esebenzisa isihluku. Amacala enzeke ngomhlaka-20 kuMbasa ka-2024 endaweni yaseZakheni. Abamangali abathathu, owesilisa omdala nabesifazane ababili abadala, bebehamba ndawonye ngemuva kokuthi abesifazane bevakashele ummangali wesilisa. Endleleni bahlangane noNdimande nenye indoda. Ummangali wesilisa ubonile ukuthi uNdimande ngumuntu wasendaweni, kanti laba ababili besifazane bebengamazi. Inkantolo iyalele ukuthi izigwebo ziqhubeke kanye kanye, okuholele ekutheni agwetshwe udilikajele. UNdimande kuthiwa naye akakulungele ukuba nesibhamu.
EMadadeni: Abaseshi ababhekelela ukuhlukunyezwa kwemindeni, ukuvikelwa kwezingane namacala ocansi KwaZulu-Natal, besebenzisana namaphoyisa aseMadadeni, babophe udokotela endaweni yakhe yokusebenza eMadadeni ngoLwesibili. Lo dokotela oneminyaka engu-69 ubudala usolwa ngokunukubeza iziguli zakhe ezine zabesifazane esibhedlela eMadadeni phakathi kukaNcwaba ka-2025 noMbasa ka-2026. Umsolwa kuthiwa wayethinta izisulu ngokungafanele emabeleni nasezithweni zangasese, kanti kusolakala ukuthi waphinde waphoqa ezinye zazo ukuthi zenze ucansi kuye. Izisulu zikhala kumuntu okhulume iqiniso ongadalulanga igama lakhe wabikela amaphoyisa. Abaseshi balusukumele lolu daba kanti emuva kokuthi izisulu zivule amacala, kwabe sekuphenywa nokwaholela ekuboshweni komsolwa.
Esithombeni esingenhla: Inxanxathela yezitolo esezingeni eliphezulu eMpangeni, enyakatho neKZN, eqanjwe ngoMntwana uMangosuthu Buthelezi ivulwe ngokusemthethweni nguhulumeni wesifundazwe.
Umthombo wesithombe: Sithunyelwe