Lungani Zungu
UNdunankulu wase-North West uJob Mokgoro useqalile ukupakisha ehhovisi lakhe njengoba i-ANC kulindeleke ukuthi imemezele uNdunankulu omusha kungekudala.
Ekuqaleni, bekulindeleke ukuthi iqembu lixoshe uMokgoro ngoMsombuluko kodwa ikomidi lesikhashana le-ANC esifundazweni sase-North West lithe lizoqala lihlangane nezinhlaka zeqembu ngaphambi kokuxosha lo sopolitiki oneminyaka engama-73 ubudala.
Lokhu kulindeleke ukuthi kwenzeke kuleli sonto.
UHlomane Chauke, oyilungu lePhalamende le-ANC futhi ongusihlalo wekomidi, uthe igama likaNdunankulu omusha lizomenyezelwa ngemuva kokuba baxoxisane nezinhlaka eziphezulu zeqembu.
“Kungalesi sikhathi kuphela lapho sizoxhumana khona nezinhlaka eziphezulu eLuthuli House,” kucashunwa uChauke esho kanjalo.
“Sisazama ukuxazulula izindaba zobuchwepheshe okufanele siziphethe”.
Phakathi kwabantu ababekwinhlolokhono ngalesi sikhundla kubalwa uSomlomo wesiShayamthetho okhona manje, uSuzan Dantjie, uNgqongqoshe wezeziMali uMotlalepule Rosho nelungu le-IPC uBushy Maape.
UMokgoro ungene esikhaleni sikaSupra Mahumapelo, ophoqeleke ukuthi ashiye phansi izintambo ngowezi-2018 ngenxa yezinkinga eziningi, ezibandakanya ukungahanjiswa kwezinsiza kusebenza.
Ngaleso sikhathi, i-ANC yayikholelwa ekutheni uMokgoro wayezosiguqula lesi sifundazwe esasinezinkinga, esasinochungechunge lwemibhikisho ngesikhathi sikaMahumapelo.
Eminyakeni emithathu kamuva, iqembu elibusayo licabanga ngenye indlela. UMokgoro usolwa ngokungathathi miyalo eqenjini kanti manje usephuma ngomnyango.
Okhulumela uMokgoro udlulisele i-Scrolla.Africa esitatimendeni esedlule sabezindaba.