Lubhalwe nguRorisang Modiba
Uhulumeni uzohlola izinto ezivela kwamanye amazwe njengamashaja ezingcingo nezinto zokugcoba ukuze ziphephe ngaphambi kokuba zifike eNingizimu Afrika ngoMandulo.
Izikhulu zizoqala ngokubheka izimpahla ezivela eChina ngoba yiyona ehamba phambili esebenzisana neNingizimu Afrika njengamanje.
Abantu baseNingizimu Afrika bazovikeleka maduze ezintweni eziyingozi zansuku zonke njengamashaja ezingcingo aqhumayo namathoyizi anamakhemikhali ayingozi.
Uhulumeni uletha imithetho emisha eqinile ukuze kunqandwe ukudayiswa kwemikhiqizo esezingeni eliphansi nengaphephile ezweni.
UMnyango Wezohwebo, Izimboni kanye Nokuncintisana wethule uhlelo lokubheka izimpahla ezivela kwamanye amazwe ngaphambi kokuba zithunyelwe.
Abathumela izimpahla manje bazodinga isitifiketi esikhethekile sokufakazela ukuthi imikhiqizo yabo iyahlangabezana namazinga okuphepha wendawo kanye nekhwalithi.
I-South African Bureau of Standards izokwengamela inqubo entsha yokuhlola. Izikhulu zama-Customs zizosebenzisa imithetho emingceleni.
Uhulumeni ugxile emikhiqizweni engahloliwe njengamanje. Lezi zinto bezilokhu zingena zinganakwa.
Imithetho emisha yokuphepha izoqondisa izinto zikagesi ezingabamba umlilo kanye namashaja ezingcingo ashisa ngokweqile futhi aqhume.
Amathoyizi anamakhemikhali ayingozi, izinto zokugcoba nemikhiqizo yenhlanzeko njengamanabukeni nawo azohlolwa ukuthi aphephile yini.
Abahloli bazobheka ifenisha nemibhede ukuqinisekisa ukuthi ihlala isikhathi eside futhi ayiyona ingozi engadala umlilo.
Izinto eziyingozi kakhulu njengemishini yegesi nezinye izinto zokwakha zizohlolisiswa ukuze kuqinisekiswe ukuthi ziphephile.
Imithetho emisha ishicilelwe ngomhlaka-20 kuNdasa ngo-2026. Kulindeleke ukuthi iqale ngasekupheleni kukaMandulo.
Amabhizinisi azoba nezinyanga eziyisithupha ukuthi azilungiselele ngaphambi kokuthi uhulumeni aqale ukusebenzisa ngokugcwele uhlelo olusha lwezokuphepha.
Uhlelo luzoqala ngokubheka izimpahla ezivela eChina.
Izikhulu zithi le mithetho emisha ayibhekisiwe ezweni elilodwa. I-China yakhethwa ngenxa yokuthi iyona esebenzisana neNingizimu Afrika kakhulu ngokungenisa izimpahla.
Uhlelo lokuhlola lunganwetshwa ukuze lufake namanye amazwe.
Esithombeni esingenhla: Iziqukathi zokuthutha.
Umthombo wesithombe: Pexels