Lubhalwe nguLinda Ximba
I-Golden Gloves Promotions isithembise ukuthi izovala unyaka ngempi enkulu kaKevin Lerana noDaniel Dubois e-London ngoZibandlela.
“Inyanga ezayo kuzoba inyanga ematasa kakhulu,” kusho umnikazi uRodney Berman etshela i-Scrolla.Africa.
ULerena uzoba ingxenye yempi ebaluleke kakhulu njengoba ezobhekana nompetha we-WBA ojwayelekile uDubois enkundleni i-Tottenham Hotspur, e-England mhla zintathu kuZibandlela.
Impi izoba ngeye-WBC heavyweight phakathi kompetha uTyson Fury noDerick Chisora.
UBerman uzobhekisa amabombo kwi-SuperSport Festival of Boxing Week ezokhonjiswa e-Emperors Palace e-Kempton Park, eGoli.
Uphromotha osemnkantshubomvu uthe abathandi besibhakela kumele bazilungiselele ukuzithokozisa.
“Sihlanganise abashayisibhakela engikholwa ukuthi maduze bazowina izicoco zomhlaba ezinkulu,” kusho uBerman.
“Umqhudelwano wokuqala uzoba ngoZibandlela futhi ubizwa nge-“Cracker Jack”.
Uthe abalandeli babheke ngabomvu umhlangano wesithathu phakathi kukaJohnny Muller no-Akani Phuzi.
“UBrandon Thysee uzobhekana noCristiano Ndombassy wase-Angola imizuliswano eyishumi,” kusho uBerman.
Ngosuku olulandelayo uChris Thompson uzobeka isicoco sakhe se-African Boxing Union heavyweight noKaton Gomes emgqeni.
“Umqhudelwano wesibili ngiwubize ngokuthi i-Young Guns ngoba uhlanganisa abashayisibhakela abasafufusa kakhulu,” kusho uBerman.
Isithombe esingenhla ngesikaRodney Berman nabashayisibhakela
Umthombo wesithombe: Golden Gloves Promotions