Dylan Bettencourt
Ukuqokwa kwentatheli ezimele u-Edwin Ntshidi ebibika ngokhetho lwakamuva lomasipala ku-Eyewitness News (i-EWN), kuveze ukukhathazeka kwabaningi mayelana ngokuziphatha kwakhe ngemuva kokuqokwa njengekhansela le-ActionSA PR ekuqaleni kwaleli sonto.
Okukhathazayo mayelana nokuqokwa kwakhe ukuthi ubesebenzisana ne-ActionSA ngaphambi nangesikhathi sokhetho ngesikhathi ekhuluma ngokhetho ne-EWN, ephula i-Press Code of Ethics.
I-South African National Editors’ Forum (i-Sanef) ithe bathole ngokuqokwa kukaNtshidi njengekhansela ngoMsombuluko.
Bathe okubajabulisile ukuthi akaseyona intatheli futhi sekuphelile ukusebenzisana kwakhe ne-EWN, kodwa bakhathazekile ngokuthi uvumile ukuthi abe ilungu le-ActionSA.
“Ubebhala ngepolitiki, kuhlanganisa neqembu alimele manje,” kusho isitatimende.
I-Sanef ithe le ntatheli ezimele ayizange ikudalule ukuxhumana kwayo ne-ActionSA ku-EWN ngaphambi kokuba iqale ukubhala ngokhetho.
“I-Sanef ibuthathela phezulu ubuntatheli obunokuziphatha okuhle, ukubika okunobulungiswa nokulingana kanye nokungahlangani kwezintatheli namaqembu ezepolitiki, yingakho sidumala ngalesi sigameko,” kusho isitatimende.
I-Sanef yengeze ngokuthi ukuqokwa kukaNtshidi kuwukwephula i-Press Code of Ethics futhi kungahle kwengeze ukungathembani okungahle kube khona emphakathini kwabezindaba.
Umhleli omkhulu we-EWN, uMahlatse Mahlase, uthe leli phephandaba lithole ngokwethembeka kwakhe eqenjini lezombusazwe isikhathi sesihambile, kodwa inkampani inemigomo eqinile ebekiwe yokugwema ukubika okungahle kube nomthelela.
“I-EWN inemigomo yokuhlela ephusile yokuqinisekisa ukubika okungachemi, futhi izindaba zihamba ngohlelo oluqinile lokucutshungulwa okubandakanya abantu abangaphezu koyedwa abagunyaza ikhophi,” kusho uMahlase.
Umthombo wesithombe: @TimesLIVE