Lubhalwe ngu-Everson Luhanga
Abesilisa abayisikhombisa nabesifazane ababili bashaqwe oKlebe ngoMsombuluko e-Krugersdorp West ngemuva kokubhadanywa endaweni okusolakala ukuthi ikhiqiza izidakamizwa.
Okhulumela oKlebe, uColonel Katlego Mogale uthe le ndawo yokukhiqiza izidakamizwa eyimfihlo ibiza izigidi. Amaphoyisa athe: “i-superlab” eku-Pulley Street, e-Boltonia e-Krugersdorp West isebenza njenge nkampani yokukhiqiza izidakamizwa.
Ababoshiwe baneminyaka ephakathi kuka-18 no-55.
“Ukutholakala kwale ndawo yezidakamizwa kube ngemuva kwezinsolo ezivele ngokusebenza kwayo.
“Amalungu ethimba le-Serious Organised Crime Investigation atheleke efemini lapho athole khona inqwaba yamakhemikhali akhiqiza i-methamphetamine. Ngesikhathi kuseshwa le ndawo kuboshwe abasolwa abayisishiyagalolunye okubalwa nabesifazane ababili,” kusho uMogale.
Uthe abasolwa ababoshiwe bazovela okokuqala eNkantolo yeMantshi yase-Krugersdorp ngoLwesithathu ngomhlaka-14 kuNhlolanja, bebhekene namacala okukhiqiza izidakamizwa ezingekho emthethweni.
Inhloko yoKlebe esifundazweni saseGoli, uMajor General Ebrahim Kadwa uncome umsebenzi waleli thimba waphinde walikhuthaza ukuthi liqhubeke nokubopha izigilamkhuba.
Uphenyo lusaqhubeka.
Esithombeni esingenhla: Ilebhu yezidakamizwa.
Umthombo wesithombe: Hawks