EThekwini: IDolobha laseThekwini selihoxise isinqumo salo esibe ngundabuzekwayo sokuvala amatekisi ahamba amabanga amade edolobheni ngemuva kokuthi ososeshini abaningi eNingizimu Afrika bevale inqwaba yamatekisi. Lokhu kuza ngemuva komhlangano phakathi kosomatekisi nezikhulu eziphezulu zeTheku obungoLwesine ntambama eThekwini. Kulo mhlangano kukhulunywe noSomlomo weTheku uMnuz Thabani Nyawose oxolisile kubaphathi bamatekisi wathembisa ukusihoxisa isinqumo sabo. Ngesonto eledlule iTheku litshele abashayeli bamabanga amade ukuthi izimoto zabo azisavumelekile eThekwini ngenxa yokuthi inkaba yedolobha kayisenazo izitendi ngenxa yokugcwala kwamatekisi erenki yabo. USihlalo weSantanco esifundeni saseGoli uVelanto Thwala uthe bayajabula ukuthi uNyawose ulivumile iphutha labo njengedolobha. Njengoba sebesihoxisile isinqumo sabo, kudingeke ukuthi sikuhoxise ukuvalwa kwamatekisi. Namatekisi ethu ngeke esateleka ngoLwesihlanu,” kusho uThwala.
Edendale: INkantolo yesiFunda yaseMgungundlovu igwebe owesilisa oneminyaka engu-20 iminyaka engu-22 nohhafu ebhadla ejele ngemuva kokuwavuma amacala amabili okudlwengula. La macala enzeke ngoNhlangulana ka-2024 nangoMasingana ka-2025 e-Edendale, eMgungundlovu. Ngesikhathi ikhipha isigwebo, inkantolo yachezuka esinqumeni esinqunyiwe sokudilikelwa yijele ngemuva kokuthola ukuvuma icala kommangalelwa kanye neminyaka yobudala kuyizimo eziqinile neziphoqayo. Ummangali, owayeneminyaka eyisikhombisa ngesikhathi kwenzeka isigameko sokuqala, ungumfowabo omncane wommangalelwa. Lezi zingane bezihlala nonina obezishiya ummangali ubegadwa umsolwa ngesikhathi umama esemsebenzini. Ummangalelwa udlwengule ummangali izikhawu ezimbili wamesabisa ngokumshaya uma kwenzeka ezibika ngezigameko.
EMpangeni: Iqembu leNkatha Freedom Party ngoMgqibelo lizokwethula ngokusemthethweni umkhankaso walo wokubhalisela ukuvota eMpangeni, enyakatho neKwaZulu-Natal, okuwuphawu lokuqala komkhankaso ogxile ezweni lonke ngaphambi kokhetho lohulumeni basekhaya oluzayo, kanti luqhubekisela phambili uhlelo lwalo lweNyanga Yabasebenzi. Iqembu lithe uMengameli we-IFP uMnuz Velenkosini Hlabisa uzokwethula inkulumo yosuku. Bathe lokhu kwethulwa kuthumela umyalezo ocacile wokuthi abantu baseNingizimu Afrika kumele bavuke, babhalise futhi babuyise amandla okulungisa imiphakathi yabo.
Osesithombeni esingenhla: USomlomo weTheku uThabani Nyawose.
Umthombo wesithombe: eThekwini