Razeen Gutta
Umdlali webhola wase-Brazil uLucas Rangel ubengomunye wezinkulungwane zabantu abasanda kubaleka edolobheni elisempumalanga ye-Poltava e-Ukraine kulandela ukuhlasela kwe-Russia – kodwa ngesikhathi ephuma wenza into ebalulekile.
Kodwa-ke, ngesikhathi ephuma, uRangel uthole isicelo esivela kumgqugquzeli wezokuxhumana u-Anderson Dias.
UDias, obeseMelika, ubenza konke okusemandleni ukuthi akhiphe umamezala wakhe wase-Ukraine uTetiana Sukhoparova kuleliyazwe.
“Nginendiza elungele ukukhipha abantu abangu-14 e-Ukraine. Esinye salezo zihlalo ngesikamama wentombi yami ngakho-ke kusele ezinye izihlalo ezingu-13,” kubhala uDias ebhalela abalandeli bakhe ku-Instagram abayizigidi ezingu-1.4.
“Ngidinga umuntu ozomlanda ngemoto edolobheni lakubo.”
Indiza ibibanjwe edolobheni lase-Poland i-Katowice.
Ngemuva kwamahora, umlayezo ufinyelele kuRangel obeseduze, futhi ngaphandle kokucabanga kabili uye wahamba neqembu labathandiweyo bakhe belibangise ukuyolanda uSukhoparova.
Leli qembu bekufanele lifike edolobheni lase-Ukraine i-Lviv ngemuva kwamahora angu-13. Kodwa-ke kubathathe amahora angu-30 ukufika.
Khonamanjalo amasosha ase-Ukraine ebebhekise amabombo e-Kyiv ehamba ephambana nabo kanti izindiza zempi zase-Russia bezindiza phezulu.
“Bekuwumsindo ovala izindlebe, into engingingakaze ngiyizwe phambilini.njengoba nezindiza bezindizela phansi. Ngivele ngacabanga ukuthi sekuphelile ngathi ngoba bazosihlasela,” kusho uRangel etshela i-BBC Sport.
“Leyo yinto ebengingakaze ngicabange ukuthi ngizodlula kuyona. Sibuka amafilimu ezimpi futhi ngezinye izikhathi sikhala nabo kodwa kuhluke kakhulu ukuzibonela mathupha.”
Iqembu bekufanele lihambe amakhilomitha okugcina angu-25 kumazinga okushisa afinyelela ku-11°C.
Ngomhlaka-28 kuNhlolanja, bafike e-Poland, njengoba babethenjisiwe bafica indiza ibalindile esikhumulweni sezindiza sase-Katowice.
USukhoparova uphephile e-Porto futhi ulindele i-visa yakhe ukuyojoyina uDias nendodakazi yakhe eMelika kanti uRangel usefikile edolobheni langakubo lase-Alvorada e-Brazil; futhi umenyezelwe njengeqhawe nguDias.
Umthombo wesithombe: @BBCSport