Dylan Bettencourt
Zonke izinqubo ePhalamende lase-Afrika (PAP) zimisiwe kuze kube isikhathi esingaziwa.
UJeffery Onganga, okhulumela i-PAP esitatimendeni ngoLwesithathu uthe: “UMnu Vipya Harawa, umabhalane wePhalamende lase-Afrika, umise ukuqhubeka kwenqubo Yesine Ejwayelekile Yephalamende lesihlanu ngaphandle kokunikeza usuku lomhlangano ozoqhubeka.”
Lokhu kudalwe ukungaboni ngaso linye okuqhubekayo mayelana nendlela okukhethwa ngayo okwaholela ezinsukwini zodlame nokuphazamiseka kwamalungu ephalamende.
Umhlangano wangoLwesibili kube nezimpikiswano eziqhubekayo mayelana nefomethi yokhetho njengoba izithunywa eziseningizimu ne-Afrika zifuna indlela entsha lapho ubuholi bujikelezwe nesikhundla sobumengameli noma ukuthi ubuholi buvotelwe ngebhalothi.
Kodwa-ke, ithimba lasentshonalanga nasempumalanga ye-Afrika lifuna ukuthi uhlelo lwamanje luqhubeke. Lolu hlelo lubandakanya umengameli kanye namaphini kamengameli amane amele isifunda esihlukile.
Udlame lwe-PAP lubandakanya omele i-Senegal uDjibril War okhahlele ilungu lePhalamende laseNingizimu Afrika, uPemmy Majondina ngesikhathi kunengxabano.
UMajondina uselwamukele uxolo ku-War.
Umholi we-EFF uJulius Malema naye uzwakale ngesonto eledlule esabisa ngokubulala ilungu lephalamende eliholele ekutheni ezinye izithunywa ziphakamise ukuthi kuthuthwe iphalamende njengoba bengasazizwa bephephile eNingizimu Afrika.
Iseshini iqale mhla zingama-21 kuNhlaba kanti bekumele iqhubeke kuze kube umhla zizi-4 kuNhlangulana ngenhloso yokukhetha ubuholi obusha.
Kodwa-ke, njengoba lokhu kungenzeki, isikhathi sihlehlisiwe futhi usuku olusha lweseshini luzokwaziswa ngumabhalane we-PAP, uVipya Harawa.
Umthombo wesithombe: @SABCNews