Lubhalwe ngu-Anita Dangazele
Umbuso ufuna uJulius Malema abhadle ejele iminyaka engu-15 ngokuqhumisa isibhamu embuthanweni ngo-2018.
Abameli baJulius Malema bacele imantshi ukuthi imnike inhlawulo ngoba akekho owalimala ngesikhathi kuqhuma isibhamu.
UJulius Malema uzothola isijeziso sakhe uma imantshi isimgweba ngoLwesine ekuseni.
Imindeni nabalandeli bahlangane eNkantolo yeMantshi yase-East London ngoLwesithathu ukuzolalela izimpikiswano zokugcina.
Icala limayelana nerali ka-2018 eMdantsane. UMalema uqhumise isibhamu phambi kwabantu abangaphezu kuka-20 000. Ividiyo yalokhu kudubula yasabalala kakhulu.
Ngo-2025, inkantolo yamthola enecala lokwephula imithetho yezibhamu. IMantshi uTwanette Olivier izokhipha isinqumo sayo ngo-09:00 ekuseni ngoLwesine.
Umshushisi uJoel Cesar ucele inkantolo iminyaka engu-15 ebhadla ejele ukuthi ithumele umyalezo ocacile emphakathini. Uthe uMalema uyilungu lePhalamende okufanele liwazi umthetho.
UCesar uthe ukudubula isibhamu kubeka izinkulungwane engozini. Uthe kwaba isimangaliso nje ukuthi akekho owalimala.
“Kulokhu, ummangalelwa akazange adubule nje kuphela, ebesingakuthatha njengengozi, kodwa ubenonya,” kusho uCesar.
Ummeli kaMalema, uLaurence Hodes, uthe ijele lizobe lingenabo ubulungiswa. Ucele inkantolo ukuthi icubungule inhlawulo ngoba akekho olimele.
“Esikushoyo ukuthi sikuvezile ukuthi ukuba nesibhamu akusho ukuthi kumele kube khona umuntu oboshiwe ngaso sonke isikhathi, kumele icala ngalinye licutshungulwe kubhekwe amaqiniso alo futhi amaqiniso aleli cala ahlukile,” kusho uHodes.
U-Advocate Tembeka Ngcukaitobi uthe amacala afana naleli awavamisile ukuholela ejele. Ubize isicelo sombuso ngokwedlulele.
“Kuyadida ukuthi bona (abashushisi) abafuni ukumfaka ejele kuphela, kodwa bafuna aboshwe iminyaka engu-15. Umdlalo abawudlalayo ukuze bahlokoloze uomphakathi,” kusho uNgcukaitobi.
Esithombeni esingenhla: UJulius Malema esethekwini eNkantolo yeMantshi yase-East London lapho ebhekene khona nesigwebo ngemuva kokudubula isibhamu embuthanweni ka-2018.
Umthombo wesithombe: Sithunyelwe