Dylan Bettencourt
I-EFF ikuqinisekisile ukuthi isidumbu sikaNkk Hilary Gardee obeyindodakazi kaGodrich Gardee sitholakale ngase-Mbombela e-Mpumalanga.
“Ngokukhulu ukuzithoba siyiqembu le-EFF sidlulisa ukudumala nokwazisa umphakathi ngokudlula emhlabeni kwendodakazi yalowo owayenguNobhala-Jikelele we-EFF,” kufundeka isitatimende seqembu ngoLwesibili ekuseni.
Lo mfundi oneminyaka engu-28 ubudala we-IT wazalelwa e-Lagos e-Nigeria ngonyaka ka-1994 ngaphambi kokuthuthela eNingizimu Afrika.
“Ubeyindodakazi yokuqala kaCommissar Godrich Gardee futhi ukushona kwakhe kushiye umonakalo ongenakulinganiswa njengoba ebhekene nobuhlungu bokulahlekelwa ingane ngale ndlela ebuhlungu kangaka enonya nengakhombisi ubuntu.
“UHillary ubengowesifazane onomdlandla, enomusa kanye nothando lwe-Information Technology,” kusho uSinawo Thambo okhulumela i-EFF kuzwelonke.
UThambo uthe uHilary ubengumfundi eNyuvesi yaseNingizimu Afrika kanti ubenebhizinisi le-IT ukuze ondle ingane yakhe eneminyaka emithathu.
Okhulumela amaphoyisa ukuqinisekisile ukuthi ingane isindile ngoLwesihlanu ngesikhathi kuthunjwa uHilary.
Imibiko iveze ukuthi uduke ngemuva kokubonwa esitolo sakwa-Spar e-Nelspruit ngoLwesihlanu.
Umalume wakhe uMoses Mbatha ukuqinisekisile ngoMsombuluko ukuthi bebemfuna selokhu wagcina ukubonakala ngehora lesithupha ntambama ngoLwesihlanu.
Amaphoyisa endawo aphume umkhankaso wokuthungatha ngempelasonto kanti ukushona kwakhe kwaqinisekiswa ngoLwesibili ekuseni.
“Kumanje umndeni ukhungethwe izindaba ezimbi zokushonelwa ingane ngakho awukwazi ukukhuluma nabezindaba,” kusho isitatimende se-EFF.
Iphosta yomuntu olahlekile ebisabalala ezinkundleni zokuxhumana iveze ukuthi ugcine ukubonakala egqoke isikibha esimnyama nebhulukwe ephethe isikhwama se-laptop.
Lo mfanekiso ubhalwe ngumholi weqembu le-EFF uJulius Malema njengoba lesi sithombe besisabalaliswa kaningi impelasonto yonke.
Umthombo wesithombe: @OnTrendNews