Lubhalwe nguSihle Mavuso
Umasipala weTheku ophethewe yi-ANC usuvimbe iqembu uMkhonto Wesizwe (MK) ukuthi libuthane enkundleni yezemidlalo iPrincess Magogo KwaMashu ngomhlaka 21 kuMbasa.
Le mpendulo engahambisani nancazelo ilandela isicelo sokusebenzisa le nkundla yezemidlalo esifakwe yiMK Party eholwa yiloyo owayenguMengameli wezwe uMnuz Jacob Zuma ukulungiselela ukhetho lomhlaka 29 kuNhlaba.
Iqembu iMK eqale ukwaziwa ngoZibandlela inabalandeli namalungu abaningi elokishini iKwaMashu okungenye yezindawo enabantu abaningi kanti ibifuna ukusebenzisa le nkundla ukukhulisa izibalo zayo.
Lo mkhankaso bekulindeleke ukuthi kukhulume kukhulume kuwo uZuma, iNkantolo yoKhetho enqume ukuthi angavela ohlwini lweqembu njengoba iMK ilungiselela ukuhlwitha iKwaZulu-Natal ku-ANC ngokhetho.
Ngokwenqwaba yama-email aputshuzelwe i-Scrolla.Africa ngabangaphakathi kumasipala weTheku abebenovalo lokuthi kunezikhulu ezisebenzela i-ANC ngepolitiki, asikho isizathu esibekiwe sokuhoxisa ukubhukhwa kwale nkundla.
Isicelo seMK esithunyelwe nge-imeyili siqale satholwa nguMarlen de Bruin oqashwe abaphathi bezindawo zemidlalo kumasipala. UDe Bruin wabe esedlulisela isicelo kuPhumla Hadebe oqashwe ophikweni olufanayo, ukuba acubungule ukubhukhwa kwale nkundla.
Esikhundleni salokho, uHadebe uthumele impendulo ebhalwe ngomugqa owodwa eya kuMK ethi: “Sicela nazi ukuthi inkundla yezemidlalo iPrincess Magogo angeke itholakale ngomhlaka-21 kuMbasa ngo-2024.”
UHadebe akazange aveze ukuthi inkundla ngabe isibhukhiwe ngalolu suku.
I-Scrolla.Africa ithinte okhulumela umasipala weTheku uGugu Sisilana, yize Ihhovisi livuma ukuthi liyitholile imibuzo yethu alizange liphendule.
UMusa Mkhize, oyinhloko yezokhetho kuMK eKZN, uvumile ukuthi iqembu livinjiwe ukuthola noma iziphi izinkundla ezinomlando.
Kodwa bamile kwelokuthi bazoya KwaMashu basebenzise inkundla evulekile ukukhuluma nabavoti.
“Ekugcineni sizoya KwaMashu siyokhuluma nabantu bakithi. Akukho okuzosivimba,” kusho uMkhize.
Isithombe esingenhla: Inkundla yezemidlalo iPrincess Magogo.
Umthombo wesithombe: Facebook