Lubhalwe nguMichael Madyira
Ukaputeni weBafana Bafana futhi ongunozinti weMamelodi Sundowns, uRonwen Williams, uqokwe kwi-Yashin Trophy ye-Ballon d’Or, okumbeka phakathi konozinti abahamba phambili emhlabeni.
UWilliams ungunozinti wokuqala waseNingizimu Afrika ukuqokwa kulo mklomelo. U-Andre Onana we-Manchester United ube ngunozinti wokugcina wase-Afrika ukuqokwa.
UWilliams ube nonyaka oncomekayo eqenjini lakhe naseNingizimu Afrika.
Usize iMamelodi Sundowns yanqoba i-African Football League waze waqokwa njengonozinti woMqhudelwano.
Ukwenza kahle kwakhe ku-Africa Cup of Nations ka-2023 kwasiza iBafana Bafana yazuza indondo ye-bronze, futhi waqokwa njengonozinti ovelele kulo mqhudelwano.
Uphinde wahlabana ngendondo kanozinti ovelele yePSL.
Manje, uWilliams angase awine indebe ye-Yashin, eqhudelana nabanye onozinti abayisishiyagalolunye abahamba phambili.
Kubalwa unozinti wase-Argentina owine iNdebe Yomhlaba u-Emiliano Martinez, uGianluigi Donnarumma we-Paris Saint-Germain, kanye no-Andriy Lunin we-Real Madrid.
Indondo ye-Yashin iklonyeliswa kunoziti ovelele emhlabeni. Iqanjwe ngegama likanozinti wase-Russia uLev Yashin, okuwukuphela kukanozinti owawila iBallon d’Or ngo-1963.
Owine indebe uzomenyezelwa emcimbini we-Ballon d’Or e-Paris ngomhlaka-28 kuMfumfu.
Isithombe esingenhla: Ukapteni weBafana Bafana futhi ongunozinti weMamelodi Sundowns uRonwen Williams.
Umthombo: iMamelodi Sundowns