Celani Sikhakhane
Usomabhizinisi waseMpumalanga ufake incwadi enkantolo yokuvimbela iJaji uRaymond Zondo ukuthi anikeze uMengameli uCyril Ramaphosa umbiko wokulawulwa koMbuso.
UMnu Thabo Prince Mtsweni we-Democracy in Action Civic Organisation e-Kwaggafontein eMpumalanga, ubhale emaphepheni asenkantolo ukuthi uRamaphosa ngeke anikezwe umbiko ngoba ungomunye wabathintekayo kuleli cala.
Amaphepha afakwe ophikweni lweNkantolo eNkulu yaseGoli.
“Ngokusho kukaNgqongqoshe esitatimendeni sabezindaba sikaMengameli, umbiko uzotholakala ehhovisi lommangalelwa wesithathu ngomhlaka-4 kuMasingana. Lokhu kuzobe kuphambene nezimiso zoMthethosisekelo waseNingizimu Afrika njengoba igama likaMengameli lithinteka kofakazi abaningi,” kusho uMtsweni emaphepheni asenkantolo.
Kulo mbhalo, uRamaphosa uvela njengabanye “abathintekayo” kuleli cala.
Esithangamini nabezindaba ngoLwesihlanu, uNgqongqoshe uMondli Gungubele ekhuluma eHhovisi likaMengameli uthe uZondo usekulungele ukunikeza uRamaphosa ingxenye yokuqala yombiko ngomhlaka-28 kuZibandlela.
Kodwa ngokuhlonipha u-Archbishop Emeritus Desmond Tutu, ukuhanjiswa kombiko kubambezelekile futhi uzodluliselwa ngokusemthethweni ngoLwesibili.
Phambilini ngoZibandlela iNkantolo eNkulu yasePitoli yelule isikhathi sekhomishana saba umhlaka-28 kuNhlolanja.
Ikhomishana izoletha umbiko wayo ngezingxenye ezintathu. Ingxenye yesibili ilindeleke ekupheleni kwenyanga ezayo kanti ingxenye yokugcina ilindeleke ekupheleni kukaNhlolanja.
Inkantolo iphinde yayalela uRamaphosa ukuthi alethe umbiko ePhalamende ungakadluli umhlaka-20 kuNhlangulana futhi afake neseluleko sokuthi kumele azifake kanjani izincomo zekhomishini.
Eminyakeni embalwa eyedlule, uphenyo lokulawulwa kombuso luzwe ubufakazi babantu abangamakhulu abakhuluma ngezinsolo zenkohlakalo kuhulumeni nasezinkampanini zikahulumeni ngesikhathi kubusa owayenguMengameli wezwe uJacob Zuma.