Dylan Bettencourt
Iziphathimandla zase-Japan bezilokhu zigasela izinkampani okuthiwa zikhokhe izigidi zamarandi kumohathi wama-olympics ase-Tokyo.
Abashushisi sebeqale uphenyo mayelana nenkohlakalo okungenzeka ihlobene nemidlalo yama-olimpiki angonyaka odlule.
Isikhulu sekomidi elihlelayo uHaruyuki Takahashi uboshwe ngenyanga edlule ngezinsolo zokuthola u-R6.2 million kumdidiyeli wezimpahla zokugqoka ukuze axhase le midlalo enelungelo lokukhiqiza izimpahla zomcimbi.
Ngesikhathi amaphoyisa epheka ngemibuzo isikhulu se-Aoki Holdings savuma ukuthi safumbathisa uTakahashi futhi sakhokhela owayenguNdunankulu uYoshiro Mori u-R250,000.
Akazange aveze ukuthi kungani afumbathisa uNdunankulu, kodwa utshele amaphoyisa ukuthi inkampani yanikeza uMori imali kabili ngesikhathi esengumphathi wama-olimpiki.
I-New York Times ibike ukuthi uMori waphoqeleka ukuthi ashiye isikhundla sakhe njengomphathi wama-olimpiki e-Tokyo kulandela ihlazo lokukhuluma ngobulili.
Okunye ukufumbathiswa selokhu kwadalulwa, imibiko yase-Japan ethi inkampani yokushicilela i-Kadokawa ikhokhele u-R8.5 million kumngane kaTakahashi okukholakala ukuthi isithathe ingxenye yemali.
Abashushisi baphinde baveza ukuthi inkampani ebizwa nge-Daiko Advertising yakhokha u-R3.1 million kulesi sikhulu. I-Daiko ibinomthwalo wemfanelo bekumele inxenxe abangaba abaxhasi bomcimbi.
Abashushisi kusamele banqume ukuthi bazomkhokhisa yini uTakahashi ngeqhaza alibambile ekusolweni kwenkohlakalo yemidlalo ebambezelekile.
Ama-olimpiki abehlelelwe unyaka ka-2020, kodwa ukubambezeleka okuphoqelekile ngenxa ye-Covid-19 kwahlehliselwa nyakenye.
NgoNhlangulana odlule ikomidi elihlelayo lase-Tokyo labika ukuthi le midlalo idle izwe u-R171 billion okuphindeka kabili isibalo sasekuqaleni. Nokho imibiko ikhomba ukuthi isibalo sangempela siphezulu kakhulu.
Umthombo wesithombe:@TheNewYorkTimes