Doreen Mokgolo
Kumalungu omphakathi amaningi, uNosipho Msiza nguyena ohlinzeka ngosizo endaweni yangakubo i-Tsakani e-Ekurhuleni.
NgoLwesithathu ekuseni, uthathe isinqumo sokwabelana ngesobho elishisayo, ikhofi nesinkwa kumavolontiya, amaphoyisa, amasosha nonogada abazimele abaqaphe i-Tsakani Mall nezinye izikhungo ezimbili zokuthenga kule ndawo ukuthi zingaphangwa noma zicekelwe phansi.
Futhi nsuku zonke kusukela lapho, isishoshovu sezempilo nosomabhizinisi silokhu siqhubeka nokwabelana ukudla namavolontiya angaphezu kwama-50 kabili ngosuku, ekuseni nantambama.
Uthe ngemuva kokuzwa ngamavolontiya anesibindi abeka impilo yawo engcupheni NgoMsombuluko ekuseni wanquma ukusiza.
“Ngabazwela ngoba bebesebenza ezimweni ezibandayo ngaphambilini ukuqinisekisa ukuthi ingqalasizinda yethu ayilinyazwa.
“La mavolontiya aqapha lezi zikhungo usuku lonke futhi awaholelwa ngemizamo yawo,” kuchaza yena.
Uthe lena yindlela yakhe yokubonga amavolontiya: “Yize ngingakwazi ukubajoyina ekugadeni izindawo zokuthenga, ngiyayibonga imizamo yabo.”
Wengeze ngokuthi njengophawu lokubonga nokweseka wanquma ukubasiza ukubagcina befudumele ngenkomishi yesobho nekhofi ngenkathi benza imisebenzi yabo emihle.
“Laba bantu bangamaqhawe ethu endawo, ngoba kungenxa yemizamo nokuzidela kwabo ukuthi i-Tsakani Mall isamile futhi ayiphangwanga ngokungafani nezikhungo ezintathu ezingaphesheya zokuthenga endaweni nakwezinye izifundazwe,” kuchaza yena.
Ngeshwa, uNosipho unovalo lokuthi imisebenzi yakhe emihle izoshabalala maduze ngoba uphelelwa igilosa ngoba izitolo eziningi kule ndawo ziphangiwe.
“Nginebhizinisi lomkhiqizo omusha futhi ngisebenzise okuningi ebenginakho esitokweni sangaphambilini ukuhlinzeka ngesobho nekhofi, kodwa nginovalo lokuthi maduze kuzophela.
“Ngiyathemba ukuthi abanye abahlali bazojoyina banikele ngezinto ezanele ezizokwazi ukusisuza,” engeza.
Ikhansela lendawo, uMnuz Sipho Sibiya, lithe kungenxa yezenzo ezinhle zabahlali ukuthi ukuthula kubuyiselwe endaweni.