Lubhalwe ngu-Anita Dangazele
Umshushisi uThami Mpekane utshele inkantolo ukuthi uDorothy Mogotsi wanika amaphoyisa ikheli elingelona iqiniso futhi usebenzisana nomyeni wakhe ukufihla lapho ehlala khona ngempela.
UMogotsi ubhekene namacala okuqamba amanga, ukuphula umthetho, ukutholakala nesibhamu nezinhlamvu okungekho emthethweni kanye nokuqhumisa isibhamu endaweni yomphakathi.
Unkosikazi kaBrown Mogotsi unikeze amaphoyisa ikheli elingelona iqiniso futhi umsiza ngokufihla lapho ehlala khona, lokho kuvele enkantolo yaseGoli ngoMsombuluko.
Umshushisi uThami Mpekane utshele inkantolo ukuthi abaphenyi baye eMahikeng eNorth West ukuyoqinisekisa ikheli lendawo okuhlala kuyo uMogotsi nomkakhe uDorothy abalinika amaphoyisa. Abatholanga lutho.
“Leli kheli belingamanga, futhi uDorothy nomfakisicelo abahlali kuleli kheli eliveziwe,” kusho uMpekane.
“Ngokubona kwami, uDorothy uhambisana nomfakisicelo ukuthi anganikezi ikheli lendawo yokuhlala efanele.”
Akukhona okokuqala uMogotsi ethwala kanzima ukuze aziphendulele lapho ehlala khona. Ngesikhathi eboshwa ngomhlaka-15 kuNhlaba, akakwazanga ukuhlinzeka ngekheli eliphelele lendawo yokuhlala.
UMogotsi ubhekene namacala okuqamba amanga, ukuphula umthetho, ukutholakala nesibhamu nezinhlamvu okungekho emthethweni kanye nokuqhumisa isibhamu endaweni yomphakathi. La macala ahlobene nezinsolo zokuzama ukubulawa kwakhe eVosloorus ngoLwezi odlule, umbuso othi waqamba amanga.
UMpekane utshele inkantolo ukuthi izitatimende zofakazi, umbiko wokwakhiwa kabusha kwesigameko sobugebengu obumangalisayo kanye nevidiyo ye-CCTV uMogotsi waphuma emotweni yakhe yohlobo lweChevrolet Aveo wadubula yena emotweni.
“Ummangali uMogotsi unamanga futhi akushoyo kuyaphambana nobufakazi obuzimele bophenyo,” kusho uMpekane.
Umbuso uyaphikisana nebheyili. Encwadini efungelwe inkantolo, umseshi uchaze kabanzi ngendlela uMogotsi afika ngayo kuye engaphakathi esitokisini ngemuva kokuthathwa kwesitatimende sakhe sesexwayiso wabuza ukuthi angenzenjani ukuze angaphikiswa ibheyili yakhe.
“Ngabe kukhona engingakwenzela khona, ukuze ungaphikisi ibheyili yami,” kusho uMogotsi, ngokwesitatimende esifungelwe somseshi.
Umphenyi uthe encwadini efungelwe watshela uMogotsi ngokushesha ukuthi angayenzi lento afuna ukuyenza . UMogotsi ukuphikile ukuthi bekuyimizamo yokugwazisa, wabe esethembisa ukunikeza imininingwane. Umseshi uthe lesi sicelo asibanga namqondo kuyena wabe esephuma ezitokisini.
Amacala okuqamba amanga anesisindo esikhulu njengoba uMogotsi watshela ikhomishana kaMadlanga ngoLwezi ka-2025 ukuthi oshayasibhamu bamlandela badubula bebhekise emotweni yakhe. “Ngabalekela impilo yami,” etshela ikhomishana.
UMogotsi uwaphikile wonke amacala.
Isicelo sakhe sebheyili sihlehliselwe umhlaka-28 kuNhlaba ka-2026 ukuze kuqinisekiswe ikheli.
Esithombeni esingenhla: Umsolwa ongumdidiyeli wezepolitiki uBrown Mogotsi uvele enkantolo yemantshi yaseGoli.
Umthombo wesithombe: X: @TheTruthPanther