Lubhalwe nguCelani Sikhakhane
Kunconywa imizamo kaNdlunkulu omdala weSilo oke wabasematheni embangweni wefa leSilo uZwelithini kaBhekuzulu ngeqhaza aselibambile ekuzameni ukudala ubumbano emndenini waseNdlunkulu.
UNdlunkulu uSibongile maDlamini wakwaKhethomthandayo kuthiwa indima aseyidlalile muva nje isibuyise ithemba emndenini waseNdlunkulu kuhlanganisa nokweseka imikhosi yeSilo uMisuzulu kaZwelithini.
“UNdlunkulu usephenduke isibani futhi indlela azinikele ngayo akafuni ukuba lo mndeni uphinde uxabane. Ngesikhathi uNdlunkulu waseMachobeni weSilo uMisuzulu kaZwelithini ukaMyeni elethe ingqibamasondo kwaKhangela Amankengane, wayekhona ehambisana nabanye oNdlunkulu.
“Wawumela loya mcimbi futhi ejabule. Watshela iSilo ukuthi kusazomele sithathe amanye amakhosikazi ukuze siqinise ubukhosi bukaZulu,” kusho omunye wezingwevu zaseNdlunkulu.
Kuthe ngoMgqibelo emkhosini wesivivane womama, uNdlunkulu MaDlamini wazibophezela ukuweseka ukuze ungashabalali umsebenzi kaNdlunkulu wakwaKhangela Amankengana uMaDlamini Mantfombi kaSobhuza osakhothama, okunguye owawuqala.
“Ngiyafisa ukuba lo mkhosi uqhubeke ngoba udlala indima enkulu ekuthuthukiseni omama. Ngakho lo msebenzi omuhle kangaka owaqalwa uMantfombi (Umama weSilo uMisuzulu kaZwelithini) nenkosi, ngithi ngizoweseka ukuba uqhubeke uthuthukise izimpilo zabantu besifazane,” kusho uMaDlamini.
UNdlunkulu uMaDlamini kuthiwa nokho alufakwa ngoba zonke izingane zeSilo, ikakhulukazi ezakwaKhangela Amankengana uyazitshela uma seziphambuka futhi uyazicacisela ukuthi azinaye omunye umama ngaphandle kwakhe nabanye oNdlunkulu nokuyibo okumele zikhale kubo.