Lubhalwe ngu-Anita Dangazele
Kuboshwe ibhungu elineminyaka engu-21 ngecala lokubulala umkhulu walo oneminyaka engu-91 elokishini laseMlungisi, e-Komani, ngempelasonto.
Umndeni uthi inkinga iqale ngesikhathi umzukulu ecela imali yokuthenga isinkwa kumkhulu wakhe oyinyanga, uMlawuli Tata.
UMlawuli umnikile imali, kodwa ngesikhathi umzukulu efuna engaphezulu, wenqabile.
Ukuze agweme ingxabano, uMlawuli uvele wagwinya imali.
Kuthiwa umzukulu ugwaze umkhulu wakhe emphinjeni wamvula isisu ezama ukuthatha imali.
Umkhwenyana wendodakazi kaMlawuli, uSiya Malman, uthe uye emzini kaMlawuli ngoLwesithathu, mhlaka-28 kuNcwaba, kodwa akekho obephendula.
“Bengiwuzwa umsakazo udlala, ngazama ukumshayela ucingo, kodwa ucingo lwakhe belungena ku-voicemail. Angizange ngikhathazeke kakhulu ngoba uvame ukuhamba namakhasimende akhe, njengoba engumelaphi wendabuko,” kusho uMalman.
Umndeni ube usuphula isicabha ngesikhathi ungamtholi ngosuku olulandelayo. Ngaphakathi bafice uMlawuli ehlezi esihlalweni embozwe ngengubo.
Okhulumela amaphoyisa uKaputeni Namhla Mdleleni ukuqinisekisile ukuthi isidumbu sikaMlawuli sitholwe sinenxeba lokugwazwa emphinjeni.
Amaphoyisa abophe umzukulu amthwesa icala lokubulala.
Kulindeleke ukuthi avele eNkantolo yeMantshi yase-Komani ngoLwesine, mhlaka-5 kuMandulo.
UMlawuli uzofihlwa esigodini sase-Mhlotsheni, KwaBhaca, ngoMgqibelo mhlaka-7 kuMandulo.
Esithombeni ngenhla: UMlawuli Tata oneminyaka engu-91 ubudala, okusolakala ukuthi ubulawe umzukulu wakhe.
Umthombo: Uthunyelwe