Lubhalwe nguCelani Sikhakhane
Umgubho weminyaka engu-40 kubusa Ingonyama yamaSwati III ubuyise ubumbano obelungalindelekile phakathi kowayenguMengameli wezwe uMnuz Jacob Zuma neqabane lakhe eseliyisitha uMnuz Cyril Ramaphosa.
Lokhu kugqame ngempela sonto eZulwini Palazzo International Convention eSwatini nalapho uZuma noRamaphosa bebonakale behleka beze baqethuke bexhawulana.
Laba baholi bobabili sebeyaziwa ngokuba inkukhu nempaka nokwasukela mhla uRamaphosa ehlula uDkt Nkosazana Dlamini-Zuma engqungqutheleni yokukhetha ubuholi be-ANC eyayiseNasrec ngonyaka ka-2017.
Kwenzeka lokhu nje kuthe ezinyangeni ezedlule uZuma wagadla ephindelela kuRamaphosa etshela abantu ukuthi akamholi walutho kodwa umdayisi ozithandela abalengu ongabafuni abantu abamnyama.
Lapho wayetshela abantu bakwaNongoma njengoba bekuzoba nokhetho lokuchibiyela.
Kuthe kusemcimbini kaMnuz Willies Mchunu obuseThekwini ngenyanga eyedlule, uZuma waphinde wagadla kuRamaphosa ethi ubulale yonke imisebenzi eyenziwe abaholi bakaKhongolose bangaphambilini.
Kule ndumezulu yomgubho obuseSwatini eLudzidzini iNgwenyama uMswati III ubegubha naneminyaka engu-58 yokuzalwa.
Le migubho iqale ngomhlaka-24 kuya kumhlaka-27 kuMbasa nokuhlanganisa omkhulu obuseSomhlola National Stadium.
INgwenyama uMswati III ibuye yavula usukasambe wehholo lesizwe lokusingatha imicimbi yomhlaba okuyiseZulwini Pallazo International Convention Centre.
UMswati uthe leli hholo lizosingatha ngisho imibuthano ye-African Union.