Menzi Magubane
Isizini yonke, iMamelodi Sundowns ibilokhu ijaha irekhodi lamaphuzu amaningi leKaizer Chiefs, kodwa ukudlala ngokulingana neSwallows ngoLwesithathu olwedlule kuyenze yahluleka ukulilwela.
Ngowezi-2014/15 Amakhosi aqopha amaphuzu angama-69 ngemuva kwemidlalo engama-30 kanti iDowns izimisele ngokwephula lelo rekhodi.
IDowns isivele isinqobile isicoco se-DStv Premiership kodwa ngamaphuzu angama-61 nemidlalo emibili esele, empeleni, izokwehluleka ukuthola irekhodi ngamaphuzu amabili.
Kodwa umsizi womqeqeshi uManqoba Mngqithi ufuna abadlali bakhe babe ngochwepheshe futhi bavikele amaphuzu ayisithupha okugcina.
“Siqale kancane sibhekene neSwallows kodwa esiwombeni sesibili abadlali bakhuphule ijubane babusa. Kodwa-ke sibe nebhadi ngokungabuyi nomphumela obudingeka,” kusho uMngqithi.
“Njengoba sekusele imidlalo emibili okumele siyidlale, ngikholwa wukuthi abadlali bami banobuchwepheshe obenele ukusitholela amaphuzu.”
NgoLwesithathu iSundowns izovakashela iBloemfontein Celtic e-Dr Petrus Molemela Stadium ngo-5 ntambama kanti uMngqithi ukholelwa ukuthi ezakhe ziwulungiselele kahle lo mdlalo.
“ICeltic ihlale isinika inkinga noma yinini uma sidlala nayo. Siwabukile amavidiyo emidlalo yabo yakamuva futhi siyabazi abadlali babo abayingozi. Abasesiyo ingozi njengakuqala kodwa ngeke sibabukele phansi,” kusho uMngqithi.
ICeltic isenalo ithuba lokuqeda isizini isendaweni ephezulu yamaqembu ayisishiyagalombili, okusho ukuthi izophonsa konke kuSundowns ukuze ithole amaphuzu aphezulu.
Eminye imidlalo yangoLwesithathu ngo-5 ntambama:
IBaroka vs iOrlando Pirates; AmaZulu vs uSwallows, iStellenbosch vs iTS Galaxy, iSuperSport United vs iMaritzburg United, iKaizer Chiefs vs iGolden Arrows, iTshakhuma Tsha Madzivhandila vs iChippa United, iCape Town City vs Black Leopards.
Umthombo wesithombe: @mamelodisundowns