Dylan Bettencourt
Umqondisi webhola lombhoxo wamaBhokobhoko uRassie Erasmus uthe ukuba nabadlali baseNingizimu Afrika phesheya kuyinto elungele izwe.
Ingosi ebhalelwe i-Daily Mail, u-Erasmus uthi lokhu akugcine nje ngokongela i-SA Rugby imali cishe engu-R400 million, kodwa kuphinde kuvimbe abadlali abasebancane base-England ukuthi bangezi eqenjini.
U-Erasmus uthe ukuntengantenga kwerandi kwenza abadlali bangaphandle baqhele eNingizimu Afrika, okwenza abadlali bakuleli abasebancane bakhuphuke ngokwezinga lokudlala.
“Abantu bathi iNingizimu Afrika ikhombisa ubuwula ngokuvumela abadlali bethu ukuthi bahambe. Ingabe lokhu kukhombisa ubuwula ngempela? Kunabadlali abayisithupha noma abayisikhombisa baseNingizimu Afrika abathatha izikhala zabadlali abasebancane base-England emaqenjini e-Premiership,” kubhala u-Erasmus.
Umqeqeshi owanqoba iNdebe yoMhlaba uthe kubadlali abangu-32 abasemazingeni aphezulu phesheya kwezilwandle, amaholo abo afinyelela ku-R400 million – okuyimali i-SA Rugby ebingeke ikwazi ukuyikhokhela.
U-Erasmus uthe iNingizimu Afrika iyazuza ngokuthi uFaf de Klerk adlale ngaphambi kukaRaffi Quirke kwi-Sale Sharks ngoba uDe Klerk uzokwazi ukudlala kangcono uma bobabili bedlala ngokuqhudelana kwamazwe ngamazwe.
U-Erasmus wayengumqeqeshi wangaphambilini wamaBhokobhoko futhi waguqula iqembu lesizwe lombhoxo ngemuva kokuba bebekezelele isikhathi esinzima ngaphansi kuka-Allister Coetzee.
Wathatha izintambo ngoNdasa ngonyaka ka-2018 ngemuva nje konyaka wahola amaBhokobhoko ekunqobeni kwawo iNdebe Yomhlaba yesithathu. Ube esedlulisela indima yokuqeqesha kuJacques Nienaber ngo-2020 lapho esengumqondisi wezokuqeqesha.
Phambilini uke waveza ukuthi angase akuthande ukuthatha isikhundla sokuqeqesha iqembu lebhola lombhoxo lase-England, kodwa kuphela uma abantu baseNingizimu Afrika bengamvumela. Uveze ukuthi uzohlala neqembu lebhola lombhoxo laseNingizimu Afrika kuze kudlule iNdebe yoMhlaba.
Inhlangano yebhola lombhoxo yase-England izomemezela umqeqeshi wayo ozovala isikhala sika-Eddie Jones ngaphambi kokuthi kuqale iNdebe yoMhlaba ngonyaka ozayo.
Umthombo wesithombe: @TheGuardian