Dylan Bettencourt
UMengameli we-Confederation of African Football (CAF) uPatrice Motsepe uthe ufuna uPitso Mosimane aqeqeshe iBafana Bafana futhi uzimisele ngisho nokumholela.
Laba basebenze ndawonye iminyaka eminingi bekwi-Mamelodi Sundowns, okuyiqembu eliphethwe uMotsepe, kanti ukholwa ukuthi uMosimane angaletha impumelelo eqenjini lesizwe lakuleli.
“Ngifisa sengathi uPitso Mosimane angaqeqesha iBafana Bafana,” kusho uMotsepe etshela izintatheli emcimbini we-South African National Editors’ Forum ngoMgqibelo ngokusho kwe-Sunday World.
“Ungumqeqeshi engimthandayo futhi uyohlala enendawo ekhethekile enhliziyweni yami ngizocela ne-Motsepe Foundation ukuthi ixhase umholo wakhe.”
UMosimane uhlomule izicoco ezingu-11 ezinkulu ngesikhathi esagijima kwi-Sundowns ngaphambi kokudlulela kwi-Al Ahly yase-Egypt.
Lo mqeqeshi oneminyaka engu-57 akanalo iqembu azoliqeqesha ngemuva kokushiya kwi-Ahly.
UMosimane, ongumphathi ohamba phambili e-Afrika useke waphatha iBafana Bafana phambilini.
Uthathe izintambo ngoNtulikazi ngonyaka ka-2010 ngemuva kokusebenza njengomsizi womphathi uJoel Santana noCarlos Parreira ngesikhathi seNdebe yoMhlaba.
UMosimane nokho uhlale iminyaka emibili kuphela ephethe izintambo ngemuva kokuhluleka ukungenisa iqembu kwi-Africa Cup of Nations ka-2012. IBafana yenza iphutha yadlala ngokulingana ne-Sierra Leone ngesikhathi iwadinga womathathu amaphuzu ukuze idlulele phambili.
Yize uMosimane kuthiwa uzobuyela kuleli, kodwa lokho akusabukeki ngemuva kokuthi i-Orlando Pirates iqoke uJose Riveiro njengomqeqeshi wayo omusha.
Ukuthuthela e-Qatar noma e-United Arab Emirates kubonakala kuyithuba elikhulu kuMosimane.
Umthombo wesithombe: @Goal