Lubhalwe nguZukile Majova
Umhleli Wezepolitiki
UNdunankulu wase-Gauteng, uPanyaza Lesufi, uchaze i-ANC njengomkhumbi ocwilayo lapho ukaputeni nabasebenzi bawo bebambana ngezihluthu bodwa esikhundleni sokuhlenga umkhumbi.
“Umkhumbi uyacwila futhi lo mkhumbi ucwila ngokushesha. Esikhundleni sokuthi sonke sizame ukuhlola nokuhlenga lo mkhumbi ukuthi ungacwili, sibanga ukuthi ubani okumele aphathe umkhumbi.
“Ungawuthatha umkhumbi, kodwa kuzobe kuyizeleze futhi uzobe ungenalutho,” usho kanje.
Kuyamangaza okushiwo uLesufi, ophinde abe nguSihlalo we-ANC esifundazweni, ojutshwe ukuthi aguqule izinto ku-ANC ngaphambi kokhetho lohulumeni basekhaya ngo-2026.
Okhethweni lokugcina lukamasipala, leli qembu lilahlekelwe ngumasipala omkhulu wase-Tshwane, Ekurhuleni naseGoli kanti belihlanganisa imifelandawonye enezimpikiswano ukuze kugcinwe iGoli kanye naseKurhuleni.
Ulesufi, owake wakhukhumala, usanda kuthotshiswa okhethweni lapho i-ANC ithole amavoti angu-36% kuphela e-Gauteng, okumphoqe ukuthi aphathe ngokubambisana namanye amaqembu.
Ekhuluma kwi-lekgotla yeqembu ephele ngoMsombuluko, uLesufi uthe izingxabano zicekela phansi iqembu.
Khonamanjalo ikomiti likazwelonke le-ANC libhekise amabombo KwaZulu-Natal lapho ukwesekwa kweqembu kwehla kusuka ku-54% kwaya ku-17% okhethweni olulodwa.
Ubuholi obuphezulu beqembu bekulindeleke ukuthi bubonise umkhombandlela ngesigungu esiphezulu sesifundazwe esiholwa nguSiboniso Duma.
Kodwa uMengameli uCyril Ramaphosa uthe sekuyisikhathi sokuthi kuhlanganiswe amagatsha eqembu.
UNobhala-Jikelele weqembu uFikile Mbalula uthe iqembu likaJacob Zuma i-MK lidide abalandeli be-ANC okungenzeka ukuthi balivotela becabanga ukuthi uZuma usasebenzela i-ANC.
Iqembu le-MK lithole ingxenye enkulu yamavoti e-KZN, lithola amavoti angaphezu kuka-45%, kodwa lehluleka ukuhlanganisa uhulumeni.
Esithombe esingenhla: UPanyaza Lesufi.
Umthombo: X