Lubhalwe ngu-Anita Dangazele
Ngaphansi kwesivumelwano sakhe ne-NPA, uMatlala kumele abambisane ngokugcwele nabaphenyi futhi afakaze ngokumelene nabo bonke abasolwa abangu-16 abasele ecaleni lokukhwabanisa ithenda lika-R228 million lakwaSAPS.
Isivumelwano sokunxeshezelwa sihlanganisa kuphela icala lethenda. UMatlala usabhekene nelinye icala lokuzama ukubulala eNkantolo eNkulu yaseGoli, kusukela ngomhlaka-20 kuNtulikazi ka-2026.
UVusimuzi “Cat” Matlala uzodonsa iminyaka eyisishiyagalombili ejele. Kodwa ngaphambi kokuthi afike lapho, usevumile ukwenza into enganyakazisa umbutho wamaphoyisa aseNingizimu Afrika ngaphakathi.
Ngaphansi kwemibandela yesicelo sakhe nesivumelwano sesigwebo neNational Prosecuting Authority, uMatlala uzibophezele ukubambisana ngokugcwele nabaphenyi. Uzofakaza ngokumelene nabo bonke abasolwa abangu-16 abasasele ecaleni lokukhwabanisa amathenda emisebenzi yezempilo yeSAPS yezigidi ezingu-R228.
Abasolwa kuhlanganisa ojenene bamaphoyisa abakhulu, ama-administrative officials kanye nosopolitiki okuthiwa yibona abaqhuba inkontileka noma bathola imali ngayo.
I-Investigating Directorate Against Corruption ithe lesi sivumelwano siklanyelwe ngqo ukususa abantu phezulu.
UMatlala useyikhiphile incwadi efungelwe kanye nobufakazi obesekayo.
Njengoba uphenyo lusaqhubeka, kufanele aphendule nganoma yimiphi imikhondo emisha evelayo okuhlanganisa nomakhalekhukhwini bakhe ababanjiwe namarekhodi ezezimali.
Isigwebo sakhe esigcwele iminyaka engu-15.
Iminyaka eyisikhombisa imisiwe. Uzobhadla iminyaka eyisishiyagalombili ngokuqondile. Uzobuyela eNkantolo Yamacala Ezohwebo ePitoli ngoLwesithathu oluzayo lapho ezokwamukela khona isigwebo.
Lesi sivumelwano asiyona iphasi yamahhala. Uma uMatlala egodla imininingwane noma eqamba amanga endaweni yofakazi, isivumelwano siyashabalala futhi abhekane nesigwebo seminyaka engu-15 ngokugcwele ngaphandle kokulengiswa.
I-NPA iphinde yaqinisekisa ukuthi isivumelwano sithinta udaba lwamathenda kuphela. UMatlala usabhekene namacala ahlukene okuzama ukubulala nelokwakha itulo lokubulala ahlobene nesigameko sokudutshulwa komlingisi uTebogo Thobejane eSandton ngo-2023.
Lelo cala liqala eNkantolo eNkulu yaseGoli ngomhlaka-20 kuNtulikazi ka-2026.
Kulabo okulindeleke ukuthi afakaze ngabo kubalwa uBrigadier Rachel Matjeng, owatshela iKhomishini kaMadlanga yophenyo ngasekuqaleni konyaka ukuthi u-R300 000 amkhokhela wona uMatlala wayemupha njengentombi yakhe, hhayi ukugwazelwa.
Ezicelweni zakhe zokwemukelwa ngoLwesine, uMatlala uthe yinkokhelo enomthelela ekukhishweni kwethenda.
Inkontileka yahoxiswa, kodwa ngaphambi kokuthi kukhokhelwe imali engaphezu kuka-R50 million.
Osesithombeni esingenhla: UVusimuzi “Cat” Matlala ngaphandle kweNkantolo Yamacala Akhethekile Ezohwebo ePitoli.
Umthombo wesithombe: Ifayela