Lubhalwe nguMichael Madyira
IMamelodi Sundowns ibhekene nenkinga yokulimala kwabadlali njengoba iqala umkhankaso wayo we-CAF Champions League.
Okungenani bayishumi abadlali baMasandawana ababekwe eceleni abalwa nezinkinga zokulimala njengoba kuyisizini ebalulekile kulezi zinkunzi zase-Tshwane.
URhulani Mokwena nabadlali bakhe base-Tanzania ukuzobhekana neqembu lase-Burundi, i-Bumamuru emdlalweni womlenze wokuqala we-Champions League e-Azam Complex Stadium ngoLwesihlanu.
UMokwena ufike kuleliya lizwe laseMpumalanga Afrika isikwati singaphelele njengoba iningi labadlali bakhe belimele.
ISundowns ike yabhekana nembibizane ekhempini ngenxa yokulimala kwabadlali kodwa ibidlala kahle.
Emasontweni edlule abadlali abamqoka abafana nokaputeni uThemba Zwane, uPeter Shalulile, uThapelo Maseko noNasir Abukeber bebedonsa kanzima ukuze babuyele ekubeni sezingeni eliphezulu.
UZwane noShalulile nokho babuyile emuva kokuthola ithuba lokululama ngemuva kwekhefu le-Fifa.
Kodwa abadlali abafana noRushine de Reuck, uSipho Mbule, uThapelo Morena noBrian Onyango basangabaza.
Ukuqina kweSundowns kuqubule imibuzo ngendlela yokuzilolonga njengoba iningi labadlali lilimala uma lizilolonga hhayi ngesikhathi semidlalo.
Isihlabani seqembu uRoger Feutmba akayinakile kakhulu inkinga yokulimala futhi ukholelwa ukuthi banakho konke okudingekayo ukunqoba i-Champions League.
“Ngikholwa ukuthi sineqembu elingahamba liyinqobe i-Champions League,” kusho uFeutmba.
“Kumele sifunde emaphutheni ethu. Ithimba lezobuchwepheshe lifundile kokwedlule futhi lilungiselela ukungena kulesi sahluko esisha.
“Sinekhwalithi. ISundowns ihamba phambili e-Afrika. Yingakho iqembu lihlale linalowo mqondo wokuthi asihambe siyonqoba i-Champions League.
“Siyazi ukuthi sinekhwalithi nokuthi yini edingekayo ukuze siwine i-Champions League.”
Ngemuva kohambo oluya eMpumalanga Afrika, aMasandawana azobuyela ekhaya azobhekana ne-Orlando Pirates emdlalweni we-Premier Soccer League ngoLwesithathu oluzayo.
Esithombeni esingenhla: IMamelodi Sundowns
Umthombo wesithombe: Mamelodi Sundowns