Lubhalwe nguBuziwe Nocuze
UZoliswa Nkuhlu waseKhayelitsha uthi manje usekhokha u-R610 ngesonto yena kanye nezingane zakhe ezimbili.
ULulama Gebane wasePhilippi East uthi ukunyuka ngo-R5 kwemali kumenza acabange ngokushiya indlu yakhe ayohlala emjondolo oshibhile.
ULulama Gebane ukhokha u-R2,000 ngenyanga ngefulethi eliseLower Crossroads, ePhilippi East. Ukwenyuswa kwemali yamatekisi ngesonto elizayo kumlethela ubunzima.
Ososeshini bamatekisi aseWestern Cape bazonyusa imali yokugibela ngomhlaka-18 kuNhlaba, okuzonyuka kusuka ku-R2 kuya phezulu. UGebane uthi imali yangakubo inyuke ngo-R5.
Akakwazi ukuya enxanxatheleni yezitolo. Ubugebengu kule ndawo benza kube yingozi kakhulu, kanti nezinhlangano zamatekisi ziyazi.
“Labososeshini banyuse imali ngisho nasezindaweni esingahamba kuzo ngezinyawo ngoba bayazi ukuthi sizobanjwa inkunzi uma singawasebenzisi amatekisi abo,” usho kanje.
Umjondolo oseduze ubiza u-R500 ngenyanga. Leli igebe lika-R1,500.
“Ngikhokha u-R2 000 werenti efulethini kodwa ngemuva kokwenyuswa kwemali yamatekisi sengiqalile ukuthungatha umjondolo engizokhokha kuwo u-R500 ngenyanga,” kusho yena.
EKhayelitsha, uZoliswa Nkuhlu ubheka ukuthi yini ephuma ohlwini lwegilosa. Ukhokha u-R270 ngesonto ngemoto yakhe kanye no-R170 ngesonto ingane ngayinye kwizingane zakhe ezimbili. Lokho kungu-R610 ngesonto ematekisini ngaphambi kokuba kuqalwe imali yokugibela entsha.
Uthi inyama yengulube namaqanda sekuphelile.
“Sizoyeka inyama yengulube namaqanda, sizothenga inkukhu namathini kuphela, sizophinde siyeke upharafini bese sifaka kakhulu kugesi,” usho kanje.
UMnuz Nceba Enge, onguSihlalo weCodeta, uthe abashayeli banyuse imali yokugibela ngoba abasakwazi ukukhokhela izindleko zezimoto. Izikhungo zezimali ziphinde zathatha izimoto zabanye abashayeli.
UMnuz Nkululeko Sityebi, onguSihlalo weCata, uthe ukukhuphuka kukaphethiloli okuqhubekayo kubenza bangakwazi ukwenza lutho.
I-Santaco Western Cape ayibeki isamba semali yokugibela esifundazweni. Inhlangano ngayinye inquma amanani ayo ngokusekelwe emizileni yayo, amabanga kanye nezindleko zokusebenza.
Esithombeni esingenhla: Ososeshini bamatekisi eWestern Cape bazokhuphula imali yokugibela ngomhlaka-18 kuNhlaba, nokunyuka kwamanani asuka ku-R2 kuya phezulu.
Umthombo wesithombe: Buziwe Nocuze