Lubhalwe nguSihle Mavuso
Unogada obonakala ezithombeni ezisabalele zowayengumengameli wezwe uMnuz Jacob Zuma ngesikhathi eboshelwe ejele lase-Estcourt KwaZulu-Natal usethole umsebenzi ophezulu eqenjini loMkhonto weSizwe (MK).
Izolo, uNombuso Mkhize uqokwe njengephini likanobhala-jikelele omusha weqembu esithangamini sabezindaba se-MK eGoli.
Yilapho iqembu limemezele khona ubuholi balo obusha bukazwelonke, obubizwa nge-national high command, obuzoholwa nguZuma njengomengameli wabo.
UMkhize, odabuka KwaZulu-Natal, ubeyisisebenzi oMnyango wezokuHlunyeleliswa kweziMilo ejele lase-Estcourt.
Ubesesikhundleni esiphezulu ngesikhathi esejele futhi wanikwa umsebenzi wokuqapha ukuboshwa kukaZuma.
“Ubenomusa kakhulu kuZuma, emthatha njengendoda yomndeni esikhundleni sesigebengu. Lokho kuholele ekutheni uZuma amhloniphe,” kusho umthombo we-MK Party kwi-Scrolla.Africa.
Abaholi abaphezulu eqenjini bathi uMkhize uphathe uZuma “ngenkulu inhlonipho”, futhi baba nobudlelwane obusondelene.
Ngokuhamba kwesikhathi uMkhize wawushiya lo mnyango, kwathi lapho uZuma ememezela ukusungulwa kwe-MK Party, wajoyina iqembu.
UZuma, (82), wagwetshwa izinyanga ezingu-15 ebhadla ejele ngoNtulikazi 2021 ngokudelela umyalelo weNkantolo yoMthethosisekelo wokuba avele phambi kwekhomishini kaZondo eyabe iphenya ngokudunwa kombuso.
Ukuboshwa kwakhe kwadala imibhikisho enodlame lapho kwabulawa khona abantu abangaphezu kuka-300.
Uhlale izinyanga ezimbili kuphela ejele kanti wasinda ukuhlala isikhathi eside ngesikhathi uMengameli uCyril Ramaphosa ememezela ukuhoxiswa kwezigwebo kulabo abangenalo udlame.
UMkhize akazange asiphendule isicelo sokuxoxisana ne-Scrolla.Africa.
Umkhulumeli we-MK Party uNhlamulo Ndhlela ubengakaphenduli esicelweni sethu sokuthi aphawule ngokuqokwa kukaMkhize ngesikhathi sokushicilela.
Esithombeni esingenhla: UNombuso Mkhize egqoke izingubo zeqembu le-MK, nangesikhathi esiza uZuma ejele.
Umthombo: X kanye ne-DCS