Lungani Zungu
UMoloantoa Geoffrey Makhubo wayeyindoda eyayizifela ngemfundo kangangokuba akazange ayeke ukufunda yize ayekhuphuka kancane ku-ANC nakuhulumeni.
UMakhubo ubenza iziqu ze-masters ngesikhathi eshona ngoLwesihlanu.
Ekhulela e-Soweto ngowe-1960, uMakhubo wajoyina umzabalazo wokulwa nobandlululo.
Wayeneminyaka eyisithupha kuphela ngesikhathi sokulwa kwabafundi base-Soweto kodwa wayebona okwakwenzeka ezweni.
UMakhubo ubefuna ukuhlala ezweni elibuswa ngentando yeningi lapho ezokwazi khona ukuqhuba amaphupho akhe ezemfundo ngokukhululeka.
Isifiso sakhe sokuqala kwezemfundo sagcwaliseka ngowe-1990 ngesikhathi ethola iziqu zakhe ze-Bcomm e-Wits.
Uphinde abe nesitifiketi se-Local Government e-University of Cape Town (i-UCT).
Lezi ziqu zamvulela iminyango.
“Kodwa ngaqhubeka nokusebenza ku-ANC ngoba ngangifuna ukusibona sonke silingana eNingizimu Afrika,” esho kwenye ingxoxo.
Ngemuva kwamashumi eminyaka yokuba ngumuntu ongaziwa ku-ANC, iqembu elibusayo lamkhetha njengoMgcinimafa wesifunda ngaphambi kokuphakama abe ngusihlalo wesifunda sase-Joburg ngowezi-2018.
Ngemuva konyaka, wathatha izintambo njengemeya yaseGoli ngemuva kokwesula kowayeyiMeya ye-DA uMnu Herman Mashaba.
Yize ukubusa kwakhe njengemeya bekugcwele ezindabeni zombango, iqembu lakhe i-ANC limchaze “njengemeya ebizinikele kakhulu” eGoli.
UMakhubo ubengomunye wabaholi be-ANC abebevele ngaphambi kwekhomishini yokulawulwa kombuso- ngezinsolo zenkohlakalo edolobheni.
Uzichaze njengomuntu “ongumholi onezimiso” ngesikhathi evela kwikhomishini ngonyaka odlule.
Ubengomunye wabaholi abasafufusa abanconyelwe ukuhola i-ANC kanye nohulumeni kazwelonke.
Ushone ngoLwesihlanu eneminyaka engama-53 ngemuva kokulwa ne-Covid-19 amasonto.
Iqembu lichaze ukushona kwakhe njengesigameko esikhulu.
Imininingwane yomngcwabo wakhe ibisazomenyezelwa kanti nomndeni wakhe ososizini ucele ukuba wodwa.