Sizwe Sibiya
Usomabhizinisi ophinde abe ngumculi uCassper Nyovest, ogama lakhe langempela nguRefiloe Phoolo, umemezele ukwethula umkhiqizo wakhe wotshwala obizwa nge-Balliato, oqanjwe ngegama lakhe lesiteketiso asezibize ngalo isikhathi eside ku-twitter, “uDon Billiato”.
“UMr Fill Up”, okuyigama adume ngalo, uthe uzobe ethula lobu tshwala, ngokwesiqubulo, esibuqukethe esithi “a touch of wealth”, ekupheleni kukaLwezi.
Yize abalandeli bakaNyovest bengazi ukuthi hlobo luni lotshwala olungaphakathi ebhodleleni le-Balliato, abasakwazi ukulinda ukunambitha “ubukhazikhazi” obungaphakathi.
Abaningi bangene ezinkundleni zokuxhumana behalalisela lo mrepha ngemuva kokuthi athule lezi zindaba kuleli sonto.
“Asikho isikhathi se-Henny,” kuphawula omunye umlandeli, ebhekise ku-Hennessy, i-cognac ehamba phambili.
Ukukhishwa kwe-Balliato kuzoqondana nokukhishwa kohlelo lukaNyovest olusha le-Root of Fame Sneakers, kulandela ukusebenzisana kwakhe ne-Drip Footwear ngemali eyizigidi eziyi-R100. I-Drip umkhiqizo wamateku waseNingizimu Afrika oyimpumelelo owasungulwa nguLekau Sehoana wase-Ivory Park ngowezi-2003.
Khonamanjalo isitebele sakhe sokuqopha umculo, i-Family Tree Records, kuthiwa sanikezwa incwadi yokugcina yesicelo ngabakwa-South African Revenue Service, ababefuna inkampani ikhokhe imali engaphezu kweyizi-R135,000 yentela engaqoqwanga, kubika i-City Press ngoMfumfu ngowezi-2021.
Kusukela lapho akukaze kubikwe ngokuthathwa kwempahla enkampanini eqophayo, esikhiqize abaculi abakhulu be-hip hop abafana noTshego kanye noNadia Nakai.