Doreen Mokgolo
Owesifazane oneminyaka engama-21 uphakathi kwabantu abane ababoshelwe ukugqugquzela udlame eDuduza, e-Ekurhuleni.
Kusolwa ukuthi wasungula wasabalalisa nemiyalezo ezinkundleni zokuxhumana ekhuthaza abahlali baseDuduza ukuba bacekele phansi bagqekeze izitolo zabantu bokufika.
Kushone abantu ababili eDuduza ngesonto eledlule, phakathi kwesibalo sabantu abashonile abangama-212 kulo lonke elase-Gauteng naKwaZulu-Natali.
Okhulumela amaphoyisa aseDuduza uSayitsheni Harry Manaka ukuqinisekisile ukuthi umsolwa udedelwe ngebheyili yama-R500 ngoMgqibelo.
Amaphoyisa aphenya nokuthi wayithola kanjani ibheyili ngokungemthetho ngaphambi kokuvela eNkantolo yeMantshi yase-Nigel.
Indawo yenyama, amakhemisi kanye nezitolo eziningi zabokufika bekungezinye zezinto ezicekelwe phansi izigebengu phakathi nesonto.
Abanye abasolwa ababili baboshiwe e-West Rand ngamacala afanayo, omunye wabo wayengumsakazi woKhozi FM nomhlaziyi wezenhlalo uNgizwe Mchunu.
Okhulumela amaphoyisa akwa-SAPS uColonel Brenda Muridili uthe imiyalezo esatshalaliswa yilona wesifazane “ibangela ukwesaba emiphakathini yethu futhi ilulaza igunya lombuso”.
“I-Intelligence Coordinating Community (ICC) iyazi ukuthi kunemiyalezo eminingi ezungeza ezinkundleni zokuxhumana ezehlukene, esabisa ngokuhlasela iziteshi zamaphoyisa; ukuhlasela izinkantolo zomthetho nengqalasizinda esemqoka njengamapayipi kaphethiloli nezinto zokuhluza; nokucekela phansi okuningi,” engeza.
I-National Joint Operational and Intelligence Structure (NatJOINTS) ithi isihlanganise izinsizakusebenza ukubhekana nezikhala ezivusa uhlevane ezinkundleni zokuxhumana.
Ubuye waxwayisa abantu abathenga izinto ezebiwe ukuthi bazoboshelwa ukutholakala nempahla eyebiwe.
“E-Gauteng, ngesikhathi kwenziwa imisebenzi yokungena emahostela amaningi e-Tembisa, eGoli, e-Alexandra nase-Moroka, kuboshwe abasolwa abayi-14 ngokutholakala nempahla okusolwa ukuthi yebiwe, kwathi abangama-92 baboshwa KwaZulu-Natali,” esho.