Lubhalwe nguDoreen Mokgolo
UDimakatso Tjege wase-Daveyton eKurhuleni usenhlanhleni yokuphila ngemuva kokuba isoka lakhe lizame ukumshisa yena nezingane zakhe ezimbili kanti kuthiwa emuva kwalokho lizame ukuzibulala.
Lokhu kungemuva kokuthi uTjege enqume ukuqeda ubudlelwano babo beminyaka emine futhi wenqaba ukusayina amaphepha agunyaza ukuthi isoka lithole ubunikazi bezimoto zakhe ezimbili kanye nendlu.
Kusolakala ukuthi umsolwa ufike emzini kamgilwa e-Daveyton ehlome ngamalitha amathathu kaphethroli nebhomu elisetshenziswa ozamazama ukuqhumisa amatshe.
Umsolwa ungene ngendluzula endlini, wakhiyela uTjege nezingane zakhe ezimbili ngaphakathi wase ethulula izigubhu zikaphethroli phezu kwefenisha ngaphambi kokuthungela indlu ngomlilo.
Ngenhlanhla, omakhelwane bakaTjege babone amalangabi base bephula umnyango ukuze uTjege nezingane zakhe baphunyuke.
Engxoxweni abe nayo ne-Scrolla.Africa uTjege uthe lo obeyisoka lakhe ubekweleta abavukuzi abangekho emthethweni abangaBasotho futhi ubefuna ukusebenzisa impahla yakhe ukukhokha isikweletu sakhe.
“Ungiphoqe ukuthi ngisayine yonke into enginayo ngiqophe ngiqinisekisa ukuthi yonke impahla yami sekungeyakhe njengoba ozamazama befuna ubufakazi.
“Ngenqabile, kodwa wangithumba wangiyisa endaweni eyisiganga emayini engekho emthethweni ngemuva kwase-Bramfischerville eGoli, lapho besilindwe khona abantu abayisishiyagalombili abangaBasotho.
“Wangitshela ukuthi uma nginqaba ukuqopha, la madoda azoshintshana ngami ngokungidlwengula.
“Ngenhlanhla ngikwazile ukubaleka ngidabula esigangeni vele bese kumnyama, ngakwazi ukubaleka,” kusho uTjege.
“Uzamile ukungishisa ngiphila kabili ngaphambilini, futhi phakathi nobudlelwano, bengiphoqeleka ukuba ngilale ngivule iso elilodwa.”
Umsolwa ogcwele amathafa kusukela kwenzeke lesi sigameko emasontweni amathathu edlule, uboshwe ngamaphoyisa ngoLwesine olwedlule eya e-Bushbuckridge.
Uvele eNkantolo yeMantshi yase-Daveyton ukuzobhekana necala lokuzama ukubulala, ukushisa, ukutholakala nokukhomba ngesibhamu esingekho emthethweni.
Uboshiwe kanti icala lahlehliselwa umhlaka-10 kuMandulo ukuze afake isicelo sebheyili.
Osesithombeni ngenhla: UDimakatso Tjege.
Umthombo: Doreen Mokgolo