Celani Sikhakhane
Umphakathi wabalimi base-Modimolle-Mookgophong e-Limpopo usadunguza ebumnyameni ngokuthi ubani ozophatha umasipala wawo njengoba kuqhubeka impi phakathi kwe-ANC namaqembu aphikisayo.
I-ANC ithole izihlalo eziyi-14 kumasipala onezihlalo ezingama-28 ngemuva kokhetho lohulumeni basekhaya kwathi i-DA yathola eziyisikhombisa, i-EFF yathola ezine, ne-FFPlus yathola ezintathu – okulingana neziyi-14 ze-ANC.
Ngokusho komthombo ongaphakathi emkhandlwini, kusuke isiphithiphithi ngesikhathi kuvotwa kabusha ngemuva kokulingana kwamavoti ngoMsombuluko ngo-14-14, amaqembu amathathu aphikisayo ehlanganyele i-ANC.
Isikhulu sibize omunye umhlangano ngoLwesibili, lapho obekubonakala ukuthi usahamba kahle, i-ANC yasola ukuthi kunevoti elonakele elingabonwanga.
I-ANC e-Limpopo ibizibekele umgomo wokubuyisa i-Modimolle-Mookgophong, eyilahlekele okhethweni lowezi-2016 yathathwa i-DA.
“NgoMsombuluko ngesikhathi kuvotelwa ukuthi kuqokwe uSomlomo, i-DA iphakamise igama layo ne-ANC yaphakamisa elabo. Umphumela uvele walingana njengoba bobabili abakhethiwe bethole amavoti ayi-14,” kusho umthombo.
Isikhulu se-DA esifundeni, uDesiree van der Walt, uthe udumele ngokuziphatha kwamakhansela e-ANC.
“Amakhansela e-ANC awafuni ukwamukela imithetho yezwe futhi awanalo ukholo ngoba ukhetho belungahamba noma kanjani,” esho.
UNobhala we-ANC esifundazweni uSoviet Lekganyane uthe: “Kudingeke ukuthi umkhandlu uhlehle ngoba amavoti ebelingana. Silindele umbiko ovela kubaholi bekhokhasi yethu.”
Okwamanje umphakathi wabalimi base-Modimolle-Mookgophong usalinde ukuzwa ukuthi ubani ozophatha umasipala.