Lubhalwe ngu-Everson Luhanga
Sekuphele iminyaka eminingi uBusisiwe Mbatha ebekezelela umyeni wakhe oyiphoyisa ohlonishwa kakhulu ekulweni nodlame olubhekiswe kwabasifazane nezingane (GBV).
Kodwa ngemuva kweminyango evaliwe ekhaya kuye kwadingeka ukuthi abekezelele ukuhlukunyezwa ngokomzimba okunyantisayo.
Iphoyisa elihlukumezayo elinguConstable lithuse abantu abaningi eGoli kwa-SAPS ngemuva kokuboshwa ngoLwesine ebusuku ngecala lokushaya uBusisiwe.
Iphoyisa elingaphansi kophiko olubhekele udlame lwemindeni, ukuvikelwa kwezingane kanye namacala ocansi e-Brakpan libhekene namacala okushaya ngenhloso yokulimaza.
Kodwa lokho akukhona okokuqala ukuthi leli phoyisa libekwe icala lokushaya uBusiswe.
I-Scrolla.Africa sivakashele lona wesifazane emzini wakhe futhi uye wachaza ngosizi lokuhlukunyezwa ngowesilisa osebenzela umthetho.
“Ngangike ngihambe naye uma eya emsebenzini wakhe lapho ayebopha khona abasolwa ngodlame olubhekiswe kwabasifazane nezingane – naye ebe engihlukumeza ngendlela efanayo nezisulu ezifika kuye,” kusho uBusisiwe.
“Izimpawu zokuhlukumeza zaqala sisanda kuthandana ngesikhathi engisola ngokumkhohlisa.
“Wayefika engashongo futhi kwesinye isikhathi wayengilandela lapho engisebenza khona.”
Umama wezingane ezimbili uthe sekukaningi isoka lakhe limhlukumeza futhi wayelixolela ngoba lalifika ngakusasa lizomncenga ukuthi alixolele.
Uthe ngo-2021 wamshaya waze waphuphunyelwa yisisu.
“Ngemuva kokuphuphunyelwa isisu wangisola ngokuhushula ingane yakhe kodwa kwenzeka ngemuva kokuthi angishaye,” esho.
“Ngomhlaka-20 kuNtulikazi nyakenye wafika nabafowabo wangihlukumeza kabi abafowabo bebukela,” esho.
Ngemuva kwalokho umndeni wephoyisa wanxusa uBusisiwe ukuthi ahoxise amacala.
Kodwa iphoyisa lophiko oluphenya amacala athinta amaphoyisa i-Independent Police Investigative Directorate (Ipid) elijutshwe ukuphenya leli cala lanqaba ukuhoxisa icala. Labopha iphoyisa ngoNtulikazi nyakenye.
Wadedelwa ngebheyili mhla zimbili kuNcwaba nyakenye.
Umsolwa uzobuyela eNkantolo yeMantshi yase-Protea ngomhlaka-27 kuNdasa ukuyoziphendulela mayelana nalokhu kushaya.
Okhulumela i-Ipid uLizzy Suping uthe: “Owesifazane uzamile ukuhoxisa icala kodwa isicelo sachithwa umbuso. Watshelwa ukuthi amacala odlame nokubulawa kwabesifazane awahoxiswa.”
USuping uthe iphoyisa belingaphandle ngebheyili ngecala lokushaya langaphambilini. Imibandela yebheyili yakhe bekuwukuthi akumele axhumane nesisulu.
I-Ipid yasiza isisulu ukuthi sivule icala lesibili mayelana naleli phoyisa kanti imininingwane izosetshenziswa ukufaka isicelo sokuthi kuhoxiswe ibheyili yakhe yangaphambilini, kusho uSuping. “Uzovela eNkantolo yeMantshi yase-Protea ngoMsombuluko mayelana naleli cala lakamuva lokushaya.”
Esithombeni esingenhla: UBusisiwe Mbatha
Umthombo wesithombe: Sithunyelwe