Lubhalwe nguCelani Sikhakhane
Uhulumeni waKwaZulu-Natal usunqume ukusebenzisa izigidi zabakhokhi bentela ukuze wakhe kabusha udonga lukakhonkolo olususe umsindo emngceleni ophakathi kweKZN neMozambique.
Lolu donga lwakhiwa ngaseMkhanyakude, eKZN yize kunophenyo olwenziwa yi-Special Investigating Unit (SIU) mayelana nalephrojekthi ka-R85.7 million.
NgoMsombuluko, uNdunankulu uNomsa MaDube Ncube wethule usonkontileka omusha ozokwakha kabusha imigoqo kakhonkolo emngceleni osempumalanga nelakuleli ukuze kuliwe nesihlava sokuntshontshwa kwezimoto nokushushumbiswa kwabantu besuka eKZN beyiswa e-Mozambique.
Akukacaci ukuthi iphrojekthi entsha izobiza malini.
IMeya yaseMkhanyakude uSiphile Mdaka itshele i-Scrolla.Africa ukuthi izindonga zokuqala eziphenywayo okwamanje ngeke zidilizwe.
Uthe usonkontileka omusha uzoqhubeka ukuze aqedele indawo engaqediwe ebalelwa ku-5 km.
Ngo-2021, uMengameli Cyril Ramaphosa wayalela ukuthi kwenziwe uphenyo mayelana nezinsolo zokungahanjiswa ngendlela kwethenda okubandakanya i-ISF Construction ne-Shula Construction, eyanikezwa inkontileka yokwakha indawo engamakhilomitha angu-8 ukusuka ku-Gate 6 kwaMhlabuyalingana.
Le ndawo yaziwa ngokushushumbisa izimoto ezebiwa ziyiswe e-Mozambique.
Uphenyo belugxile ekutheni ithenda yanikezwa ngendlela efanele yini i-ISF ne-Shula ngemuva kwezinsolo zokungahambi kahle kwethenda.
Kuthiwa ithenda yakhishwa uMnyango wezokuThutha esifundazweni ngaphandle kwemvume yoMnyango wezemiSebenzi yoMphakathi.
I-SIU kumele ihlole ukuthi ngabe konke kwenzeka kulandelwa izinqubo ezinobulungiswa, ezincintisanayo, nezingafihli lutho, ezithobela imithetho neziqondiso ezifanele.
Ngo-2021 ikomiti lePhalamende leMisebenzi yoMphakathi kanye neNgqalasizinda lidalule ukuthi isamba semali engu-R48 million sabe sesikhokhelwe osonkontileka bengakaqedi ukwakha.
Okhulumela i-SIU, uKaizer Kganyakgo akatholakalanga ukuba aphawule ngesimo sophenyo.
Okhulumela uNdunankulu waseKZN uBongi Gwala uthembise ukuthi uzophendula nge-email kodwa kuze kwashaya isikhathi aokishicilela engaphendulile.
Esithombeni esingenhla: Kuzokwakhiwa kabusha udonga lukakhonkolo emngceleni ophakathi kweKZN ne-Mozambique oluzodla imali engu-R85.7 million nakuba i-SIU isaqhubeka nophenyo
Umthombo wesithombe: IPhalamende laseNingizimu Afrika