Lubhalwe ngu-Everson Luhanga
Kuboshwe amadoda ayisikhombisa ngoLwesibili ntambama ngemuva kwesigameko sokugetshengwa kwesitolo sobucwebe enxanxatheleni yezitolo i-Clearwater, entshonalanga neGoli.
Okhulumela amaphoyisa esifundazweni saseGauteng, uLieutenant-Colonel Mavela Masondo, uthe ukuphendula ngokushesha kwamaphoyisa nezinkampani zonogada ezizimele kuholele ekuboshweni kweqembu lezigelekeqe, elisanda kugebenga isitolo sobucwebe sase-Roodepoort.
UMasondo uthe amaphoyisa athole izibhamu ezine kubasolwa.
“Kulimale amaphoyisa amabili nabasolwa abathathu ngesikhathi sokudubulana. Iphoyisa elilodwa lilashelwe endaweni yesigameko, elinye laphuthunyiswa esikhungweni sezempilo lisesimweni esibucayi kodwa manje lisesimweni esizinzile,” usho kanje.
UMasondo uthe izigebengu zigasele esitolo sobucwebe zafika zabamba abasebenzi inkunzi zibakhombe ngezibhamu.
“Abasolwa bantshontshe inqwaba yobucwebe esitolo. Ngesikhathi bephuma enxanxatheleni yezitolo bavinjezelwe ngamaphoyisa nonogada abazimele.
“Abasolwa baqale ukudubula bebhekise kwabomthetho, kwase kuba nokudubulana. Abasolwa abane bavinjezelwe ekhoneni baboshwa ku-Christiaan de Wet Road, maqondana nenxanxathela yezitolo, kwatholakala nezibhamu ezimbili,” usho kanje.
Amaphoyisa alandele amanye amalungu eqembu lezigelekeqe e-Dobsonville, lapho okuboshwe khona amanye amadoda amathathu, kwatholakala nezibhamu ezimbili. Obunye ubucwebe obuthathwe esitolo sebutholakele.
UKhomishana wamaPhoyisa eGauteng, uLieutenant General Tommy Mthombeni, uthe ukuboshwa kwalaba kuhlobene nokusebenzisana phakathi kwamaphoyisa ophiko lwe-SAPS, uMnyango wamaPhoyisa kaMasipala waseGoli kanye nezinkampani zonogada ezizimele.
“Ngithanda ukubonga zonke izinhlaka zomthetho ezibambisene ukuqinisekisa ukuthi abasolwa bayaboshwa nokuthi kutholakale nezibhamu ngemuva kokwenziwa kobugebengu,” usho kanje.
“Ukuboshwa kwalaba bantu kumele kuthumele umyalezo kuzo zonke izigebengu ukuthi abomthetho sebesilungele isikhathi samaholidi kaKhisimusi.”
Abasolwa bazovela eNkantolo yeMantshi yase-Roodepoort maduze ukuze babhekane namacala okugebenga, ukuzama ukubulala, ukutholakala nezibhamu ezingekho emthethweni kanye namanye.
Esithombeni esingenhla: Indawo yesigameko e-Roodepoort.
Umthombo wesithombe: Sithunyelwe