Lubhalwe ngu-Everson Luhanga
Amadoda amabili asolwa ngokuvukela nokusabisa umphakathi e-Alexandra aboshwe ngamaphoyisa ophiko lwe-Tactical Response Unit of Johannesburg Metropolitan Police Departments (JMPD).
Abasolwa kuthiwa bagasele kumakhonteyina okuhlala abantu endaweni okwadutshulwa kuyo kwabulawa ikhansela le-EFF, uMnuz Moshe Mphahlele, esikhathini esingangesonto eledlule.
Laba bobabili babhekene namacala obugebengu okutholakala nesikhali esiyingozi, ukukhomba ngesibhamu, ukugwema nokunqaba ukuboshwa, ukuhluleka ukuthobela umyalelo wamaphoyisa osemthethweni, ukushayela budedengu, ukushayela ngokungacabangi, nokusabisa e-Alexandra.
Okhulumela i-JMPD uXolani Fihla ukuqinisekisile ukuboshwa kwabasolwa.
UFihla uthe amaphoyisa athole isikhalo mayelana nequlu labantu abebehamba ngemoto yohlobo lwe-Toyota HiAce emhlophe okuthiwa bebesabisa umphakathi ezindlini ezingamakhonteyina e-Alexandra, eziku-4th no-8th Street.
“Amaphoyisa athunyelwe kule ndawo kwathi uma efika ayibona imoto iphuma endaweni.
“Umphakathi ukhombe imoto yabasolwa. Ngesikhathi amaphoyisa ezama ukumisa imoto, umshayeli wenqabile ukulalela wazama ukushayisa amaphoyisa.
“Amaphoyisa ajahe abasolwa ngesivinini esiphezulu, abasolwa bakhomba amaphoyisa ngesibhamu ngasemnyango wabagibeli,” kusho uFihla.
UFihla uthe imizamo yokumisa imoto ebingena ekujuleni e-Alexandra, amaphoyisa adubule ebhekise emotweni yabasolwa. “Amaphoyisa agcine ekwazile ukudubula amathayi emoto yaze yama.
“Abasolwa bazamile ukubaleka ngezinyawo kodwa amaphoyisa aphuthume ababamba. Kuthe uma kubhekwa imoto kwatholakala ukuthi kunesibhamu esimnyama,” kusho uFihla.
Uthe laba bobabili baboshwe bavalelwa e-SAPS e-Alexandra ngamacala ahlukene. Imoto esetshenziswe ekwenzeni ubugebengu ithathwe yafakwa endaweni yokugcina izimoto eziboshiwe e-SAPS yase-Aeroton.
“Kuphinde kwatholakala ukuthi laba basolwa bebehlukumeza umphakathi wase-Alexandra ngezibhamu mihla namalanga,” kusho uFihla.
U-MMC wezokuPhepha koMphakathi eGoli, uMgcini Tshwaku, usishayele ihlombe isenzo esisheshayo sala maphoyisa.
“Ngithanda ukudlulisa ukubonga kwami ngezinyathelo ezisheshayo ezisetshenziswe yi-JMPD TRU ukulandela nokubopha abasolwa ngempumelelo.
“Abezomthetho bazibophezele ekugcineni umthetho nokuhleleka emiphakathini yethu, ikakhulukazi e-Alexandra, lapho isimo esibi khona kulandela umbhikisho womphakathi oholele ekutheni kudlule ngeshwa ikhansela laseGoli uMnuz Moshe Mphahlele,” kusho uTshwaku.
UTshwaku uthe bazokwenza ngayo yonke imizamo ukuba baphenye ukuze kuqinisekiswe ukuthi bonke abathintekayo ngokufa kukaMphahlele bayagwetshwa. “Izakhamizi ziyanxuswa ukuthi zihlale ziqaphile futhi zazise abomthetho nganoma yimiphi imisebenzi esolisayo.”
Esithombeni ngenhla: Indawo lapho izigebengu ezimbili ebezihlomile zisabise khona abantu emakhonteyina okuhlala e-Alexandra, eGoli.
Umthombo: I-Joburg Public Safety