OThukela: I-IFP isabise ngokuthi izobaxosha abaholi abagaqele izikhundla uma behluleka ukumisa imikhankaso yabo ezinkundleni zokuxhumana njengoba kuyiwa engqungqutheleni yokukhetha ubuholi.
Iqembu likhiphe lo myalelo kuleli sonto kulandela umdonsiswano oshubile phakathi kwabaholi bendawo esifundeni sasoThukela, abagaqele izikhundla ezingeni lesifunda, izifunda kanye namagatsha. I-IFP ixwayise ngokuthi noma yimuphi umholi ovumela igama lakhe ukuthi lisetshenziswe ezinkundleni zokuxhumana uzobhekana nezinqubo zangaphakathi futhi akhishwe ekungeneleni umbango.
Izinhlaka ze-IFP zilibangise ezingqungqutheleni zezifunda zokukhetha ubuholi obushubile kule mpelasonto njengengxenye yokulungiselela ingqungquthela kazwelonke yokukhetha ubuholi, ehlehliswe izikhathi eziningi. Imithombo yasoThukela itshele iScrollla.Africa ukuthi le nhlangano inovalo lokuthi imikhankaso yalolu hlobo ingase ihlukanise iqembu ngaphambi kokhetho lohulumeni basekhaya bese iphoqa amalungu ukuthi avotele amanye amaqembu ezepolitiki.
ERichards Bay: Umkhakha wezamabhizinisi uzwakalise ukukhathazeka ngombhikisho ohleliwe wangomhlaka-30 kuNhlangulana obhekiswe kwabokufika ngokungemthetho, besaba ukuthi ungase ulimaze amabhizinisi njengoba kwenzeka izibhelu zangoNtulikazi ka-2021.
Lezi zikhalazo zivele emhlanganweni obuphakathi kweZululand Business Chamber of Commerce neSAPS eRichards Bay ngoLwesihlanu. UMajor General Anthony Gopaul wamaphoyisa weluleke ukuthi noma yiliphi ibhizinisi eliqasha abantu bangaphandle ngokungemthetho kufanele livalwe ngalolo suku waphinde wanxusa osomabhizinisi ukuthi basungule imigudu yokuxhumana namaphoyisa ukuze kusheshe kutholakale usizo.
“Uma ibhizinisi lakho liqasha abokufika abangenazo izincwadi, livale lelo bhizinisi ngoba wephula umthetho, ngeke sihlale etafuleni sixoxe ngokuthola amabhizinisi abantu abaphula umthetho,” kusho uGopaul.
EThekwini: Ubuholi be-DA KwaZulu-Natal buyisukumele imashi ehlelelwe abantu bokufika kuleli ngokungemthetho, bunxusa imiphakathi ukuthi yehlise umoya futhi inqabe udlame, ukuqapha nokucwaswa kwabantu bokufika ngesikhathi ivuma ukukhungatheka kwangempela kwabantu abaningi baseNingizimu Afrika abakuzwayo ngokuntuleka kwemisebenzi, ubugebengu kanye nengcindezi yokuhlinzekwa kwezidingo zomphakathi.
Iqembu lithi izisombululo ezisimeme zidinga ukubuyiselwa komthetho nokuhleleka, ukuqinisa ukuphathwa kwemingcele kanye nokuqinisekisa ukuthi imithetho yabokufika isetshenziswa ngendlela efanele futhi engaguquki. I-DA kulindeleke ukuthi ihlangane nabezindaba eThekwini ngoMsombuluko ukudingida kabanzi lolu daba.
Esithombeni esingenhla: I-IFP isabise ngokuthi izobakhipha esikhundleni abaholi engqungqutheleni yokukhetha ubuholi uma behluleka ukumisa imikhankaso yabo ezinkundleni zokuxhumana.
Umthombo wesithombe: UCelani Sikhakhane