UCelani Sikhakhane ukulethela izindaba zakamuva ezenzeka KwaZulu-Natal.
EPaulpietersburg: Umphakathi waseDumbe e-Paulpietersburg esigodini saseBhadeni ube nosuku lweNkululeko ekuseni ngoLwesihlanu ngemuva kokuba iloli ebeligcwele ubhiya ligingqika emgwaqeni oyibhuqu. Umphakathi uzitapele obhiya endaweni yesigameko. Esikhundleni sokusindisa umshayeli, bonke abesilisa nabesifazane baphuthume beyosindisa amabhodlela kabhiya. Bagebenga isitoko obekuhloswe ngaso ukuthuthukisa umnotho wendawo ngaphambi kwempelasonto ende.
ENewark: UNgqongqoshe wezokuThuthukiswa koMphakathi KwaZulu-Natal, uMbali Shinga, usenxuse imiphakathi ukuthi isebenzisane namaphoyisa ukuze kuliwe nobugebengu obunonya obudla lubi ezindaweni eziningi KwaZulu-Natal. UShinga ubekhuluma ngesigameko sokubulawa ngobuningi kwamalungu omndeni ayisikhombisa ahlaselwa athunjwa ngesikhathi kubanjwa inkunzi. Imibiko iveza ukuthi obesebenzela izisulu ufike lapho asebenzela khona ngoLwesithathu ekuseni wafica kugqekeziwe umuzi, kulahleke abantu abayisikhombisa nemoto. Amaphoyisa athole ukuthi omunye wabasolwa obesebenzela izisulu kuthiwa ugqekeze nabehamba nabo wababopha ngentambo. Omunye wabasolwa kusolakala ukuthi udlwengule owesifazane oneminyaka engu-20 ngaphambi kokuthi abalayishe emotweni yesinye sezisulu walibangisa eMelmoth, okuyibanga elilinganiselwa ku-200km ukusuka endaweni yesigameko, bafike bababulala.
EScottburgh: Owayeshayela budedengu uMuhammad Khan uhlawuliswe u-R50 000 noma izinyanga ezingu-12 ejele, kanti ingxenye yazo zimisiwe, ngemuva kokubanjwa ehamba ngesivinini esiphezulu ku-N2 eScottburgh. UKhan uvele eNkantolo yeMantshi yaseScottburgh ezobhekana necala lokweqa umkhawulo wejubane elijwayelekile. UNgqongqoshe wezokuThutha eKZN, uMnuz Siboniso Duma, uthe phambilini amaphoyisa akwaRTI abophe izigebengu ezaziwayo, abameli, onjiniyela, odokotela, amaphoyisa, amasosha, onogada, abokufika abangenazo izincwadi, abashayeli bamaloli, abashayeli bamatekisi, abefundisi, othisha, abahlengikazi, abashushisi, izisebenzi zikahulumeni nochwepheshe abaningi. “Umyalezo wethu ucace bha, akekho ongaphezu komthetho. Okokugcina njengoba sekusondele izimpelasonto ezimbili ezinde, sizokwengeza ukusebenza kwethu kwiNenzaniLaEzweni sisebenzisa ubuchwepheshe obusezingeni eliphezulu. I-Automatic Number Recognition System efakwe ezimotweni ezigadayo,” kusho uDuma.
Esithombeni esingenhla: Amalungu omphakathi wasesigodini saseBhadeni aziyapele utshwala esikhundleni sokusindisa umshayeli weloli engozini yomgwaqo.
Umthombo wesithombe: Sithunyelwe