OPhongolo: ISilo samaZulu sithumela ithimba leSilo eZambia ukuyohlanganyela nabantu abazovalelisa inkosi uNgoni uMphezeni IV, oshone eneminyaka engu-75 ubudala. Umngcwabo wakhe uzokuba ngoLwesibili.
Okhulumela iSilo uMisuzulu kaZwelithini, uMntwana uThulani Zulu weNdlunkulu yaseZibindini, uthe iSilo sanquma ukuthumela ithimba eLusaka ukuyohlonipha impilo nefa leSilo uMphezeni IV. Ithimba lizobe liholwa nguMntwana uThulani nosanda kuqokwa esikhundleni sokumela iSilo samaZulu, iNkosi Malusi Zondi.
UMntwana uThulani uthe ukudlula emhlabeni kweNkosi uMphezeni IV kuwukulahlekelwa kubo bonke abahlonipha isiko nobumbano lwama-Afrika.
Inkosi yobukhosi bakwaNgoni uMphezeni IV uyinzalo yenkosi uZwangendaba owabaleka KwaZulu-Natal ngemuva kokuhlulwa yinkosi uShaka ngezimpi zamaMfecane wayozinza eZambia.
E-Estcourt: INational Prosecuting Authority ikwamukele ukugwetshwa kukadilikajele kwendoda eneminyaka engu-40 ubudala yiNkantolo yesiFunda yase-Estcourt ngemuva kokulahlwa yicala lokudlwengula indodakazi yayo. Amacala enzeka e-Weenen ngo-2022.
Ummangalelwa wayenguyise wommangali futhi ehlala naye nezinye izingane zakhe. Unina kammangali obegula ehlala nezinye izihlobo. Ummangali ubephekela ummangalelwa amugeze unina engekho. Ngo-2022, ummangalelwa wamdlwengula kabili, ngoNdasa noLwezi, egcina isibhamu sakhe sibonakala ngesikhathi ekwenza lokho. Ube esemsabisa ngokuthi uzombulala uma engalubika lolu daba.
Umshushisi uZamaswazi Ndlovu uhole ubufakazi bukammangali njengofakazi oyedwa njengoba bobabili unina nogogo wakhe bashona ngaphambi kokuthi icala liqulwe. Izitatimende zabo zofakazi zihanjiswe enkantolo njengengxenye yecala lombuso, kanye nobufakazi bukadokotela.
EThekwini: UMnyango wezeMisebenzi yoMphakathi neNgqalasizinda KwaZulu-Natal usamukele isinqumo seNkantolo eNkulu yaseThekwini esihoxisa ukukhishwa ngendlela engafanele kwethenda ka-R7 billion ngesikhathi sokuphatha kwangaphambilini ukuze kusetshenzwe endaweni kahulumeni.
Ithenda bekuwukwakhiwa kwesizinda esizofaka yonke iminyango kahulumeni wesifundazwe ngaphansi kophahla olulodwa, kwenziwe ngcono ukusebenza kahle kanye nokuhlinzekwa kwezidingongqangi. Uma isiqediwe, le ndawo izokonga uhhafu webhiliyoni lezigidigidi zeMisebenzi yoMphakathi e-KZN ngonyaka ezindlekweni zokuqasha ezikhokhelwa izindawo ezihlala abasebenzi bomnyango abahlukene.
Yize kunezethembiso ezenziwa yisikhungo, lo msebenzi umile cishe ngokushesha, washiya iminyango kahulumeni isabalele esifundazweni futhi kubiza kakhulu umbuso ngokubambezeleka unyaka nonyaka.
Esithombeni esingenhla : ISilo uMisuzulu kaZwelithini uthumele ithimba lasebukhosini ukuba liyothamela umngcwabo wenkosi yasoNgoni uMphezeni eZambia. Ibhokisi loNgangezwe Lakhe libukiswe emigwaqeni yaseLusaka ngesikhathi izwe lizilela ukudlula kwakhe emhlabeni.
Umthombo wesithombe: Sithunyelwe