UCelani Sikhakhane ukulethela izindaba zakamuva ezenzeka KwaZulu-Natal.
ENanda: Ubuholi besikhashana be-SACP e-KZN buwushaye indiva umbuthano woSuku lweNkululeko ye-ANC owawuseNanda, lapho uMengameli wokuqala wentando yabantu uNelson Mandela avotele khona ngomhlaka-27 kuMbasa ka-1994. Kunalokho umcimbi ubuhanjelwe ubuholi obuhlakaziwe be-SACP obuholwa ngowayenguNobhala wesifundazwe iMoses Mabhida (KZN), uThemba Mthembu. Lokhu kuza ngemuva kokuthi i-SACP ithathe isinqumo sokungenela ukhetho loHulumeni baseKhaya oluzayo iphikisana ne-ANC. Lesi sinqumo siholele ekutheni uNobhala Jikelele we-ANC uMnuz Fikile Mbalula abhalele wonke amalungu e-Alliance izincwadi ukuthi akhethe phakathi kwe-SACP ne-ANC. Ubuholi be-SACP abukasithathi kancane lesi sinqumo. Manje sebesola i-ANC ngobuxhwanguxhwangu.
ELadysmith: Amaphoyisa angamalungu e-Combat Rifle Teams anikezwe ithuba lokucija ikhono lawo lokudubula emcimbini we-Combat Rifle obuseWagonhill Shooting Range eMnambithi, maphakathi neKwaZulu-Natal. Umdlalo wezinsuku ezimbili we-high-adrenaline rifle uqale ngoLwesihlanu waze wafika ngoMgqibelo. Amaphoyisa abephuma ezifundazweni ezahlukene okubalwa iKZN, iGauteng, I-Eastern Cape, iNorthern Cape, iNorth West neFree State abebanga lesi sicoco. Amaphoyisa abe nokuncintisana kanzima kumalungu ombutho wezokuvikela wezwe laseNingizimu Afrika nawo abebukisa ngamakhono awo okudubula. Izakhamizi ezingamalungu amaqembu e-Combat Rifle nazo beziyingxenye.
EThekwini: UMasipala weTheku ususebenze ama-invoice angaphezu kuka-5,000 ngohlelo olusanda kwethulwa lokukhokha ama-invoice nge-inthanethi, namanye ama-invoice angu-2,982 agunyazwe ukuba akhokhwe, abonisa inqubekelaphambili kusenesikhathi ekwenzeni ngcono ukusebenza kahle nokulethwa kwezidingo. Idolobhakazi lithi ukwethulwa kohlelo lwama-invoice ku-inthanethi kuyingxenye yemizamo kamasipala ebanzi yokwenza ngcono ukusebenza kahle, ukubeka izinto obala kanye nokuhambisana nemithetho nemithethonqubo esebenzayo elawula ukuphathwa kwezimali. Abahlinzeki bezinsiza bayakhuthazwa ukuthi baqhubeke nokusebenzisana nomasipala ngalesi sikhathi soguquko ukuze baqinisekise ukuthotshelwa komthetho ngokugcwele.
Esithombeni esingenhla: Ubuholi besikhashana be-SACP esifundazweni iMoses Mabhida (KZN) buwushaye indiva umbuthano we-ANC woSuku lweNkululeko obuseNanda.
Umthombo wesithombe: ANC KZN