Lubhalwe nguPalesa Matlala
Iqembu lezigebengu iShinyHunters lithumele i-email ohlelweni lwezokwelapha lwamaphoyisa lithi lintshontshe imininingwane yamalungu.
Kwelinye icala, iphoyisa lithe amalungu ezigelekeqe aye ekhaya lakhe ngemuva kokuputshuka kwemininingwane yakhe yangasese.
Amaphoyisa kanye nemindeni yawo angase abe sengozini ngemuva kokuthi izigebengu zithi zebe imininingwane yomuntu ngamunye kwaSouth African Police Service Medical Scheme.
Iqembu lezigebengu elizibiza ngokuthi i-ShinyHunters lithumele i-email yokuqola isuka ekhelini langaphandle.
Izigebengu zithi zigqekeze isistimu ohlelweni futhi zantshontsha imininingwane yamalungu ohlelo.
Uhlelo lwezokwelapha luqashe uchwepheshe ozimele we-cybersecurity ukuze athole ukuthi izigebengu zingene kanjani nokuthi yiluphi ulwazi eziluthathile.
U-Neo Khauoe uyisikhulu esiphezulu salolu hlelo. Uthe uhlelo seluxhumane nawo wonke amalungu ukubaxwayisa.
Uthe ukwabelana ngolwazi oluningi kungalimaza uphenyo lwamaphoyisa futhi kusize nezigebengu.
Lolu hlelo luvule icala lobugebengu esiteshini samaphoyisa saseBrooklyn ngaphansi komthetho weCybercrimes Act. I-Information Regulator nayo itsheliwe ngalolu songo.
Okhulumela amaphoyisa uBrigadier Athlenda Mathe ukuqinisekisile ukuthi amaphoyisa ayaphenya nge-email ye-ShinyHunters.
Ulwazi oluputshuziwe luyingozi ngempela emaphoyiseni.
Kwelinye icala, iphoyisa elineminyaka engu-37 ubudala ophikweni lwe-Anti Drug Unit liveze ukuthi ulwazi oluputshuziwe lubeka kanjani umndeni walo engcupheni.
UThato Mokoena uthe umndeni wakhe usubhekane nokuhlukumezeka iminyaka engaphezu kwemithathu.
Uthe amalungu ezigelekeqe aye kubo eyobheka izibhamu zakhe zamaphoyisa.
“Izincwadi zami zokusebenza zihlanganisa nekheli lasekhaya lomzali wami, ngihlezi ngizibuza ukuthi bayithola kanjani imininingwane yami ngoba ngathuthela emzini wami eminyakeni eminingi ngaphambi kwesigameko ukuze ngivikele umndeni wami,” usho kanje.
UMokoena uthe abantu abahlukumeza umndeni wakhe baphinde bashayela ucingo lwakhe bemsabisa.
Uhlelo lwezempilo luthe lenza konke okusemandleni ukuvikela amalungu ngesikhathi uphenyo lusaqhubeka.
Esithombeni esingenhla: Ilogo ye-Polmed.
Umthombo wesithombe: Polmed/Facebook