Lubhalwe ngu-Anita Dangazele
Kwebiwe amakhebuli ethusi abiza imali engaphezu kuka-R250 000 endaweni yokugcina impahla kamasipala waseNelson Mandela Bay emasontweni amathathu elandelana.
Ngokusho kokhulumela i-DA eNMB emkhakheni kagesi nezamandla u-Ondela Kepe uthe, izigebengu azisenamahloni kangangokuthi zigqekeza emini kabha.
“Kube nemibiko ethusayo yokugetshengwa emini kabha bekhonjwa ngezibhamu, nokubeka engcupheni abasebenzi bakamasipala,” usho kanje.
Uthe umasipala ulahlekelwe amakhebuli amabili angu-132m, okudle idolobha imali engaphezu kuka-R250 000.
Isigameko sokuqala sokweba senzeke ngoLwesibili mhlaka-27 kuNcwaba, esesibili senzeka ngoMsombuluko mhla zimbili kuMandulo kanye nesigameko sakamuva ngoMsombuluko mhla ziyisishiyagalolunye kuMandulo.
UKepe uthe phezu kwalezi zigameko ezishubile umasipala awenzi lutho ukuvikela abasebenzi bawo.
“Ukweba okuphindaphindiwe endaweni yokugcina impahla akusona nje isenzo sobugebengu, kodwa kuyisibonelo esicacile sokwehluleka kobuholi eNelson Mandela Bay,” engeza.
NgoNcwaba, izingxenye ezinkulu zeNelson Mandela Bay zachitha isonto lonke zingenawo ugesi ngemuva kokuwa kwezakhiwo ze-pylon ngenxa yokungalungiswa.
“Amandla kamasipala okugcina ingqalasizinda abukelwa phansi, okushiya izingxenye zedolobha lethu engcupheni yokuwela ebumnyameni. Ubugebengu buyachuma ebumnyameni futhi lokhu kubeka ukuphepha kwezakhamuzi engcupheni,” usho kanje.
Uthe sekuphele unyaka kungekho ezokuphepha kule ndawo.
“Amasela ahehwa ezokuphepha ezintekenteke, asephendule le ndawo isizinda sawo – okubeka abasebenzi bakamasipala nezakhamizi engcupheni nokungaqiniseki. Nokho, ithini impendulo yobuholi bamanje bomfelandawonye? Buthule.”
Ubhalele ibamba lemenenja yedolobha uMandla George ngeziphakamiso ezimbalwa:
• Ukufakwa kodonga olusha, oluqinile lwezitini oluzozungeza indawo yokugcina impahla ukuze luthathe indawo yesakhiwo esiphuka kalula.
• Ukufakwa kabusha kocingo lukagesi namakhamera e-CCTV ukuze kuqinisekiswe ukugadwa okufanele kanye nokuvimba izigilamkhuba.
• Ukuqashwa konogada abahlomile abazogada endaweni ubusuku nemini futhi bavikele impahla yedolobha.
Esithombeni ngenhla: Amakhebuli asikiwe futhi antshontshwa yizigebengu.
Umthombo: SIthunyelwe