Lubhalwe nguMichael Madyira
UMqeqeshi weMamelodi Sundowns Ladies, uJerry Tshabalala, akagxili ezenzweni ezingezinhle zeqembu elidlale ngendlela egculisayo ku-US Women’s Cup ngesonto eledlule.
AmaBrazilians aqale ahlulwa ngamagoli amathathu eqandeni i-Kansas City Current ebisingathe umdlalo ngaphambi kokuthi ihlulwe ngamagoli amabili eqandeni yiqembu lase-Japan, i-INAC Kobe, baqeda endaweni yokugcina emqhudelwaneni onamaqembu amane.
Lokhu kusho ukuthi ompetha base-Afrika besifazane baphindele ekhaya bengazange bafake igoli enethini emqhudelwaneni, lapho bebe khona yiqembu lokuqala lase-Afrika ukubamba iqhaza.
Nokho uTshabalala akagxilile ekuhlulweni kwabo kodwa usegxile ezintweni ezinhle ezithathwe kule midlalo.
“Ngake ngasho ngaphambilini ukuthi sikulo mqhudelwano ukuzofunda, futhi sifunde izinto ezahlukene,” etshela umnyango wezindaba weqembu.
“Ngikholwa ukuthi uma sesibuya ngesinye isikhathi, sizobuya siyiqembu elingcono.
“Uyazi ukudlala ne-Kansas City Current kanye ne-INAC Kobe kusishintshile ngoba kusiphushele ngaphandle kwendawo yethu yokunethezeka futhi kwasikhombisa lapho kufanele sithuthuke khona.
“Ukuncintisana namaqembu alolu hlobo kugqamise amandla ethu nezindawo ezidinga ukulungiswa kahle.”
E-US, iSundowns ibiyisithunzi seqembu elase linqobe iCAF Women’s Champions League kabili kumasizini amathathu edlule.
Abazange baziphathe njengeqembu elidle umhlanganiso ebholeni lasekhaya ngezicoco eziyisithupha zeWomen’s Super League.
Ukuvela obala kwaMasandawana e-US akuvamile emaqenjini ase-Afrika, okuchaza ithemba lomqeqeshi ngekusasa.
“Sibuyela ekhaya sinesifiso esivuthayo sokuthi lolu hlobo lokuchayeka kaningi lusenze sikwazi ukuhambisana namaqembu aphezulu emhlabeni wonke,” kwengeza uTshabalala.
“Ukuncintisana nezimbangi ezisezingeni eliphezulu kubalulekile ekukhuleni kwethu, futhi iyona ndlela kuphela esingazilinganisa ngayo namaqembu angcono kakhulu.
“Lezi zinto azigcini nje ngokusiphonsela inselelo kodwa futhi ziyasikhuthaza ukuthi siphakamise umdlalo wethu futhi siqhubeke nokuthuthuka.”
Umsebenzi omkhulu weBanyana ba Style kulo nyaka kuzoba ukuzama ukuvikela isicoco sayo seChampions League, futhi basebenzise iWomen’s Cup ukulungiselela lokho.
Isithombe esingenhla: IMamelodi Sundowns Ladies ilungiselela ukubhekana ne-INAC Kobe
Umthombo wesithombe: Mamelodi Sundowns