Lubhalwe nguMichael Madyira
IStellenbosch FC ibheke ukuhamba phambili uma isidlala neNsingizini Hotspurs emlenzeni wesibili womzuliswano wokuqala weCAF Confederation Cup eMoses Mabhida Stadium ngoMgqibelo.
Iqembu laseCape Winelands lihamba phambili ngamagoli amathathu eqandeni emdlalweni wokuqala okulibeka ethubeni elihle lokudlulela emzuliswaneni olandelayo.
Nokho umqeqeshi uSteve Barker akawasebenzisi amathuba, uxwayisa ngokuthi iNsingizini Hotspurs isengabamangaza.
IStellenbosch ithole ukunqoba emlenzeni wokuqala yize ilahlekelwe ngabadlali abamqoka uDeano van Rooyen no-Iqraam Rayners, abaye kwamanye amaqembu ePSL.
Banethemba lokuthi bazokugcina lokhu emdlalweni ozayo.
UBarker ubalule ukuthi nakuba umphumela wamagoli amathathu eqandeni ubukeka umuhle, awukhombisi ngokugcwele ukuthi umdlalo ubunzima kangakanani.
“Izimbangi zethu ziqeqeshwe kahle futhi zinabadlali abaqinile okwenze kwaba nzima kithina ukwakha amathuba emdlalweni wokuqala,” kusho uBarker.
“Sishaye igoli esimweni esimapeketwane ngale komdlalo webhola ocacile, kodwa ke kwesinye isikhathi uyaklonyeliswa ngokufaka ingcindezi kwiqembu enisuke nibhekene nalo.”
Umdlali wasemuva wase-Ivory Coast, u-Ismael Toure, ongadlalanga emlenzeni wokuqala, angase adlale ngoMgqibelo ngemuva kokuzilolonga neqembu lokuqala kuleli sonto.
IStellenbosch isathungatha ozovala isikhala sikaRayners njengoba imizamo yayo yokusayinisa umgadli weCape Town Spurs u-Ashley Cupido ingaphumeleli.
NjengeNsingizini, iStellenbosch yintsha ebholeni lezwekazi futhi izimisele ngokuqhubeka nohambo lwayo kulo mqhudelwano weCAF.
Isithombe esingenhla: Umqeqeshi weStellenbosch FC uSteve Barker uhola abadlali bakhe ekuzilolongeni.
Umthombo: Stellenbosch FC