Lubhalwe nguDoreen Mokgolo
Ukhishiwe esikhundleni uthisha wase-Unity Secondary School, eDaveyton, eKurhuleni ngemuva kokuthi abafundi bethi ubanukubeza ngokocansi.
Usolwa ngokuthinta ngokungafanele abafundi nokushaya indlwabu ekilasini.
Abafundi bathi sekuyisikhathi eside behlukunyezwa yilothisha weHistory neSesotho kusukela ngo-2021.
“Ubhema insangu ngaphambi kwamakilasi, uma isingene ekhanda ufuna bonke abafundi ekilasini lakhe bashaye ulayini njengoba efaka izandla ngaphansi kweziketi zethu ukuze asithinte esithweni sangasese,” kusho omunye umfundi.
“Ubebuye akwenze kubafundi besilisa ngokubathinta ezithweni zabo zangasese.”
Abafundi basayine incwadi yezikhalazo befuna akhishwe.
Abazali baphinde babhikisha ngaphandle kwesikole ngoMsombuluko.
“Kusize imibhikisho yabafundi ukuze kuthathwe izinyathelo. Asifuni ukubona lo thisha ebuyela emagcekeni esikole,” kusho omunye umama.
Ividiyo ezungeza ku-inthanethi ikhombisa uthisha ethinta umfundi wesifazane ngaphansi kwesiketi sakhe.
Abafundi bathi uthisha uphinde athinte abafundi besilisa abuke nezithombe zocansi ekilasini.
“Ngeke sisakwazi ukuqhubeka,” omunye umfundi etshela iScrolla.Africa.
“Sake salubika udaba kodwa akwenzekanga lutho. Sifuna aphume esikoleni sethu.”
UMnyango wezeMfundo eGauteng uyaziphenya lezi zinsolo, uthisha udluliselwe ehhovisi lesifunda njengendlela yokunqanda isimo.
“Uma uphenyo seluphothuliwe, uMnyango uzothatha izinyathelo ezifanele,” kusho okhulumela uMnyango uSteve Mabona.
Isithombe esingenhla: i-Unity Secondary School
Umthombo: Sithunyelwe