Lubhalwe ngu-Anita Dangazele
Imininingwane yangoNdasa ikhombisa ukuthi kubiza u-R934,93 ukondla ingane eyodwa, kanti Isibonelelo Sikahulumeni Sezingane sikhokha u-R560, okushiya kushoda njalo ngenyanga.
Isibonelelo sikahulumeni singaphansi kwesilinganiso sobumpofu futhi sikhokhela amaphesenti angamashumi ayisithupha okudla okuyisisekelo okunomsoco wengane.
Abanakekeli abathembele Kusibonelelo Sikahulumeni Sezingane bayantula nyanga zonke. Imali ayizithengi zonke izindleko eziyisisekelo zokondla ingane.
I-Household Affordability Index kaNdasa 2026 ikhombisa ukuthi kubiza u-R934,93 ukondla ingane eyodwa ukudla okuyisisekelo okunomsoco. Isibonelelo sikahulumeni sikhokha u-R560. Lokho kushiya igebe lika-R374,93 njalo ngenyanga.
Lokhu kusho ukuthi isibonelelo sikahulumeni sikhava ingxenye kuphela yalokho okudingwa ingane ukuze idle ngendlela efanele. Abanakekeli kufanele bazizamele enye imali.
Imininingwane iphinda iqhathanise isibonelelo sikahulumeni nomugqa wobumpofu bokudla. Leli inani elincane elidingekayo ukuhlangabezana nezidingo zansuku zonke zamandla. Ibekwe ku-R855 umuntu ngamunye ngenyanga.
Isibonelelo Sikahulumeni Sezingane siwela ngaphansi kwalowo mugqa. Kuphinde kusalele emumva ezindlekweni zangempela zokudla okuyisisekelo kwengane.
Amanani okudla ehle kancane ngoNdasa. Izindleko zokondla ingane zehle ngo-R7,29 kusukela ngoNhlolanja. Iphinde yehla ngo-R16,07 uma iqhathaniswa nekaNdasa wonyaka odlule.
Okunye ukudla kushibhile. Ilayisi lehle ngo-6%. Inyama yenkomo yehle ngo-5%. Ama-apula ehle ngo-9%.
Kodwa lezi zinguquko ezincane azilivali igebe. Abanakekeli kusafanele bazame imali ezokwanela ekudleni, kwezokuthutha nezinye izidingo.
Ucwaningo lukhombisa ukuthi imindeni ivamise ukuthenga ama-staples kuqala. Lokhu kubandakanya impuphu, isinkwa nelayisi. Amaprotheni nemifino kuza kamuva, uma imali ivuma.
Leli qembu liphinde laxwayisa ngokuthi ukwenyuka kwamanani kawoyela kungase kunyuse izindleko zokudla futhi ezinyangeni ezizayo.
Esithombeni esingenhla: Abanakekeli badonsa kanzima ukuze belule Isibonelelo Sikahulumeni Sengane njengoba izindleko zokudla zihlala ziphezulu kunalokho okukhava isibonelelo.
Umthombo wesithombe: Sithunyelwe