Lubhalwe nguPalesa Matlala
NgoLwesibili, iNkantolo eNkulu yasePitoli ilalele izimpikiswano zokugcina mayelana nesicelo sikaNkosi sebheyili ngemuva kokuthi imantshi ikhiphe isinqumo sokuthi angaphazamisa uphenyo uma ededelwa.
Abashushisi batshele inkantolo ukuthi uNkosi ubenamadokhethi amaphoyisa, izibhamu ezingekho emthethweni, ana-grenade kanye nemali engaphezu kuka-R300 000 engaqondakali ngesikhathi amaphoyisa egasela emzini wakhe.
Iphoyisa elimisiwe lilwela ukuphuma ejele ngemuva kokuthi inkantolo imqabele ibheyili ngenxa yezibhamu, imali namadokhethi amaphoyisa atholwe emzini walo.
NgoLwesibili, iNkantolo eNkulu yasePitoli ilalele izimpikiswano zokugcina zikaFannie Nkosi mayelana nesinqumo semantshi esimgcine evalelwe. Imantshi yasePretoria North yamnqabela ibheyili ngoMbasa, ithola ukuthi angaphazamisa uphenyo noma abaleke uma ededelwa.
UNkosi ungusayitsheni ophikweni lwamaphoyisa aseNingizimu Afrika ophiko lobugebengu obuhleliwe. Wamiswa ngomhlaka 28 kuMbasa kanti kudingeke ukuthi abuyise isibhamu sakhe somsebenzi, izinhlamvu nawo wonke amadokhethi.
Abashushisi batshele inkantolo ukuthi imali engaphezu kuka-R300 000 ingena ebhange likaNkosi kanti kuthiwa ubehola cishe u-R16 000 ngenyanga.
IJaji uMokhine Mosopa licindezele kaningi ithimba labammeli bakaNkosi mayelana nemali kanye namadokhethi amaphoyisa atholwe ngesikhathi kugasela emzini wakhe eDorandia.
UMbuso ukuphikisa kakhulu ukukhululwa kwakhe. Umshushisi uTrott Mphahlele uthe isinqumo semantshi besizwakala futhi sisekelwa ubufakazi. Utshele inkantolo ukuthi asikho isizathu esiphuthumayo sokuthi uNkosi akhululwe.
“Kuhamba njengenjwayelo ekhaya njengoba unkosikazi esebenza, akekho obulawa indlala sikhuluma nje” kusho uMphahlele.
Ummeli kaNkosi, uHendrick Potgieter, uthe uMbuso uhlulekile ukuveza ubufakazi bokuthi ikhasimende lakhe lizobaleka noma liphinde lenze icala uma linikwa ibheyili, wathi inkantolo ayizinakanga ezinye izindlela zokuvalelwa.
Ngesikhathi amaphoyisa egasela endaweni kaNkosi ngoMbasa athola izibhamu eziyisikhombisa, izinhlamvu zikahulumeni ayengazilethile, isibhamu esikhulu namadokhethi ayisithupha ahlobene nokugetshengwa kweCIT nokudunwa kwezimoto, wonke avaliwe akekho owaboshwa. Amadokhethi amahlanu kwakungawokuqala.
UNkosi usolwa ngokuba yingxenye yezigebengu namaphoyisa aphezulu okubalwa noJenene Shadrack Sibiya osamisiwe emsebenzini. Amacala abhekene nawo ahlobene nokutholwe emzini wakhe.
Esithombeni esingenhla: INkantolo eNkulu yasePitoli isigodle isinqumo sokudlulisa isicelo sebheyili sephoyisa elimisiwe uFannie Nkosi.
Umthombo wesithombe: @CrimeWatch_RSA/X