Lubhalwe nguSihle Mavuso
Sekuqubuke impi yombango wesihlalo sobukhosi bakwaSithole, eMhlumayo ngaseMnambithi enyakatho yeKwaZulu-Natal.
Lokhu kuza ngemuva kokuthi enye yamadodana enkosi engasekho uLwazi Sithole, eyakhothama ngo-2010, icele uMnyango wezokuBusa ngokuBambisana neziNdaba zoMdabu KwaZulu-Natal (Cogta), ukuthi wehlise umalume wayo uMnuz Ngqayivele Sithole, esikhundleni sokuba yibamba leNkosi kubekwe yona.
Inkosana uSabelo Sithole (33) uthi nguye umholi wendabuko osemthethweni kulesi kulesi sizwe.
Uthumele incwadi efungelwe ngalolu daba emnyangweni ngeledlule. Incwadi efungelwe ingenye yezincwadi eziningi inkosana uSabelo azibhalele umnyango njengoba elwela ukuhlala kulesi sihlalo sobukhosi.
“Ngifisa ukuzwakalisa ukudumala nokungeneliseki kwami ngoMnyango wakwa-Cogta mayelana nobuzibulo bami kanye nesikhundla okufanele ngabe ngisiphethe njengenkosi yesizwe sakwaMhlumayo nanjengendodana okuyiyona ekhona yeNkosi engasekho uLwazi Sithole.
“Sengizame kwanhlanga zimuka nomoya ukuxhumana nomnyango wakwa-Cogta ukuze ngibeke obala mayelana nesikhundla sami sobukhosi baseMhlumayo.
“Kusukela ngonyaka ka-2015 kube yibhadi elibi ukunganakwa nhlobo yizikhulu zoMnyango esifundeni sasoThukela.
“Bengiwumqemane futhi ngikulungele ukuthatha isikhundla sami njengenkosi yaseMhlumayo kodwa angizange nginikwe ithuba lokuthatha isikhundla sami.
“Ngike ngaxoxisana namanye amalungu omndeni kodwa akekho obonakala ekhathazekile ngesimo sami. Nokho-ke, amanye amalungu omndeni wami alesaba kakhulu Ibamba-bukhosi elibonakala linamandla ngisho nangaphakathi emndenini uqobo,” kusho uSithole encwadini efungelwe.
Uthe ibamba lamxosha nomama wakhe esigodlweni sikayise.
“Ukhethe ukusixosha esigodlweni somndeni ngoba kubonakala sengathi uma siqhubeka nokukhuluma ngokulungela kwami ukuhlala esihlalweni simdalela izinkinga,” kusho inkosana uSabelo encwadini yakhe efungelwe.
Uqinisekise kwa-Scrolla.Africa ukuthi wabhala incwadi efungelwe nezinye izincwadi azithumela kwa-Cogta.
UMnyango uthe uNgqongqoshe uThulasizwe Buthelezi akanalwazi ngalolu daba, usazofuna izimpendulo ezikhulwini ngaphambi kokuthi aphawule ngalo.
Inkosi esabambile ayitholakalanga kumakhalekhukhwini wayo. IScrolla.Africa sizoshicilela uhlangothi lwakhe lodaba ngokushesha uma nje simthola.
Esithombeni ngenhla: Inkosana uSabelo Sithole ufuna isihlalo sobukhosi bakwaSithole eMnambithi.
Umthombo: Uthunyelwe